الگ الگ رنگ کے ڈبوں میں کوڑا کرکٹ جمع کیا جائے گا، 30 ستمبر تک تمام اسکولوں میں ڈبے لگانے کی ڈیڈ لائن
لاہور: وزیراعلیٰ پنجاب مریم نواز شریف نے صوبے میں جدید ویسٹ مینجمنٹ سسٹم متعارف کرانے کے لیے بڑا قدم اٹھایا ہے اور حکم دیا ہے کہ کچرے کو جمع کرنے کے لیے رنگ دار کوڑے دان استعمال کیے جائیں۔
پہلے مرحلے میں "اسمارٹ ویسٹ مینجمنٹ پراسیس” کو پنجاب بھر کے سرکاری و نجی تعلیمی اداروں میں نافذ کرنے کی منظوری دی گئی ہے۔
پنجاب حکومت کے نوٹیفکیشن کے مطابق تعلیمی اداروں میں پانچ رنگ کے کوڑے دان رکھے جائیں گے۔ اس منصوبے کی نگرانی سینیئر وزیر ماحولیات و کلائمٹ چینج مریم اورنگزیب کریں گی جبکہ وزیر تعلیم رانا سکندر اور وزیر لوکل گورنمنٹ ذیشان ملک کو ٹارگٹس سونپ دیے گئے ہیں۔ تمام اسکولوں میں 30 ستمبر تک رنگ دار کوڑے دان لگانے کی ڈیڈ لائن دی گئی ہے، جس کے بعد یکم اکتوبر سے معائنہ شروع ہوگا اور خلاف ورزی کرنے والے اداروں پر جرمانے عائد کیے جائیں گے۔
مریم نواز کا شہری کو فون، پنجابی میں کیا بات ہوئی؟
رنگ دار ڈبوں کی تفصیل:
- پیلا رنگ: کاغذ اور ردی کے لیے
- سبز رنگ: بوتلیں، کانچ کے ٹکڑے، لیبارٹری کا ضائع شدہ سامان
- سُرمئی (گرے): پھلوں کے چھلکے، ضائع شدہ کھانا، پتے اور سبزیاں
- لال رنگ: لوہے اور دیگر دھاتی کوڑا
- نارنجی (اورنج): پلاسٹک ویسٹ
ان اشیاء کو ری سائیکل کرکے دوبارہ استعمال کے قابل بنایا جائے گا تاکہ کچرے کی مقدار میں کمی لائی جا سکے اور ماحول دوست رویوں کو فروغ دیا جا سکے۔
مزید برآں، پنجاب مینجمنٹ ہیلپ لائن (1139) پر تعلیمی ادارے کچرے کو اٹھانے کے لیے رابطہ کر سکیں گے۔ لوکل گورنمنٹ اینڈ کمیونٹی ڈویلپمنٹ ڈیپارٹمنٹ ان ڈبوں کے انتظام کی نگرانی کرے گا جبکہ ماحولیات کا ادارہ (ای پی اے) نفاذ کو یقینی بنائے گا۔
ای پی اے ٹیم درس گاہوں کا معائنہ کرے گی اور جو ادارے معیار پر پورا اتریں گے انہیں سرٹیفکیٹ جاری کیا جائے گا۔
