پنجاب میں صنعتی کارکنوں کے لیے فلیٹس کی الاٹمنٹ کا آغاز، قصور اور لاہور کے ورکرز درخواستیں جمع کرا سکتے ہیں، بیوگان اور معذور ورکرز کے لیے خصوصی کوٹہ مختص۔
لاہور، وزیراعلیٰ پنجاب مریم نواز شریف کی مزدور دوست پالیسی کے ثمرات سامنے آنے لگے ہیں، صنعتی کارکنوں کو فلیٹوں کی الاٹمنٹ کا سلسلہ شروع کر دیا گیا ہے۔
وزیراعلیٰ کی ہدایت پر ضلع لاہور اور قصور کے صنعتی ورکرز سے فلیٹ کی الاٹمنٹ کے لیے درخواستیں طلب کر لی گئی ہیں۔ انتقال کرجانے والے صنعتی کارکنوں کی بیوگان کے لیے 3 فیصد اور معذور ورکرز کے لیے 2 فیصد کوٹہ مختص کیا گیا ہے۔
پنجاب ورکرز ویلفیئر فنڈ نے ورکرز ویلفیئر کمپلیکس سندر انڈسٹریل سٹیٹ قصور فیز ون میں الاٹمنٹ کی کارروائی کا آغاز کردیا ہے، جہاں صنعتی کارکنوں کو 720 فلیٹ دیے جائیں گے۔
ضلع لاہور اور قصور کے صنعتی کارکنوں کے لیے گھر بیٹھے ویب سائٹ سے درخواست فارم حاصل کرنے کی سہولت فراہم کی گئی ہے، جبکہ ڈائریکٹر لیبر ویلفیئر نارتھ و ساؤتھ اور ڈپٹی ڈائریکٹر لیبر ویلفیئر قصور کے دفاتر سے بھی فارم دستیاب ہوں گے۔
ضلع قصور کے صنعتی ورکرز کے لیے دو تہائی اور ضلع لاہور کے ورکرز کے لیے ایک تہائی ہاؤسنگ یونٹ کوٹہ مقرر کیا گیا ہے۔ درخواستیں جمع کرانے کی آخری تاریخ 8 ستمبر مقرر کی گئی ہے۔
