پاکستان ایئرپورٹس اتھارٹی (پی اے اے) نے کراچی اور لاہور کے درمیان بعض فضائی راستوں کو عارضی طور پر بند رکھنے کا حکم جاری کر دیا ہے۔
یہ بندش آج اور کل، یعنی 14 اور 15 جنوری کو نافذ العمل رہے گی، جس کے باعث اندرونِ ملک پروازوں کے شیڈول میں تبدیلی کا امکان ہے۔
پی اے اے کی جانب سے جاری کردہ نوٹم کے مطابق کراچی اور لاہور فلائٹ انفارمیشن ریجن کے درمیان کچھ مخصوص فضائی راستے آپریشنل وجوہات کی بنیاد پر عارضی طور پر بند کیے جا رہے ہیں۔ نوٹم میں بتایا گیا ہے کہ دونوں دنوں میں بندش کا دورانیہ شام 7 بجے سے رات 10 بجے تک ہوگا، جس دوران ان فضائی راستوں پر پروازوں کی آمد و رفت معطل رہے گی۔
پاکستان ایئرپورٹس اتھارٹی نے مسافروں کو ہدایت کی ہے کہ وہ اپنی پروازوں کے حوالے سے بروقت معلومات حاصل کرنے کے لیے متعلقہ ایئرلائنز سے مسلسل رابطے میں رہیں۔ پی اے اے کا کہنا ہے کہ ممکن ہے بعض پروازوں کے اوقات میں رد و بدل کیا جائے یا متبادل فضائی راستے اختیار کیے جائیں تاکہ فضائی آپریشن متاثر نہ ہو۔
پاکستان میں شدید دھند، موٹرویز بند اور لاہور میں فلائٹ شیڈول متاثر
ایوی ایشن ذرائع کے مطابق یہ بندش مکمل فضائی حدود پر لاگو نہیں ہوگی بلکہ صرف چند مخصوص فضائی راستے متاثر ہوں گے۔ تاہم، اس کے باوجود کراچی اور لاہور کے درمیان سفر کرنے والے مسافروں کو تاخیر یا شیڈول میں تبدیلی کا سامنا کرنا پڑ سکتا ہے، خصوصاً شام اور رات کے اوقات میں روانہ ہونے والی پروازوں کو۔
پی اے اے حکام کا کہنا ہے کہ یہ اقدام فضائی آپریشن کو محفوظ اور مؤثر بنانے کے لیے کیا جا رہا ہے اور بندش عارضی نوعیت کی ہے۔ مقررہ وقت کے بعد فضائی راستے دوبارہ کھول دیے جائیں گے اور معمول کے مطابق پروازوں کی آمد و رفت بحال ہو جائے گی۔
فضائی سفر کرنے والے مسافروں نے ایئرپورٹس اتھارٹی کی جانب سے پیشگی اطلاع کو مثبت اقدام قرار دیا ہے، تاہم انہوں نے مطالبہ کیا ہے کہ ایئرلائنز مسافروں کو بروقت آگاہ کریں تاکہ کسی قسم کی پریشانی سے بچا جا سکے۔
پی اے اے نے یقین دہانی کرائی ہے کہ مسافروں کی سہولت اور سلامتی اولین ترجیح ہے اور مستقبل میں بھی کسی بھی ممکنہ تبدیلی سے قبل بروقت آگاہی فراہم کی جاتی رہے گی۔
