اسلام آباد: پاکستان تحریک انصاف نے 5 اگست 2025 کو ہونے والے احتجاج کے لیے اپنا لائحہ عمل جاری کر دیا ہے۔
پارٹی کی قیادت نے مرکزی جلسے یا اسلام آباد کی جانب مارچ کے بجائے فیصلہ کیا ہے کہ احتجاج ہر ضلع کی سطح پر منعقد کیا جائے گا تاکہ ملک بھر میں آئینی حقوق کی پامالی کے خلاف آواز بلند کی جا سکے۔
ذرائع کے مطابق پشاور ریجن میں ریلی کا آغاز سہ پہر ساڑھے تین بجے حیات آباد ٹول پلازہ، رنگ روڈ سے ہوگا، جو قلعہ بالا حصار تک جائے گی۔ یہ ریلی وزیر اعلیٰ خیبرپختونخوا علی امین گنڈا پور کی قیادت میں نکالی جائے گی اور رات گئے تک جاری رہے گی۔ یہ احتجاج پی ٹی آئی کے بانی چیئرمین عمران خان کی دو سالہ غیر قانونی قید کے خلاف بھی علامتی ردعمل ہوگا۔
صوابی میں احتجاج کا مرکز امبار انٹرچینج ہوگا، جہاں کارکن سہ پہر 3:30 بجے جمع ہوں گے اور عشاء تک اپنا احتجاج جاری رکھیں گے۔ اسی طرح نوشہرہ میں مظاہرین خیرآباد میں اکٹھے ہوں گے، جہاں احتجاجی سرگرمیاں بھی شام سے لے کر رات تک جاری رہیں گی۔
پارٹی کی ضلعی قیادت کو ہدایت کی گئی ہے کہ تمام منتخب ارکان اسمبلی اور ٹکٹ ہولڈرز اپنے اپنے علاقے میں احتجاج کی وڈیو ریکارڈنگ کریں اور یہ مواد ضلعی تنظیم کے ذریعے ریجنل قیادت کو جمع کرائیں۔
پی ٹی آئی کا مؤقف ہے کہ یہ احتجاج تحریکِ تحفظ آئین کا حصہ ہے اور اس کا مقصد پاکستان میں جمہوری و آئینی بالادستی کے لیے آواز اٹھانا ہے، بجائے کسی محاذ آرائی یا دارالحکومت پر دباؤ کے۔ یہ احتجاج پرامن ہوگا اور عوامی شرکت پر انحصار کرے گا۔
