قومی اسمبلی کے 6 اور صوبائی اسمبلی کے 7 حلقوں میں ضمنی انتخابات کی انتخابی مہم آج رات 12 بجے ختم ہو گئی ہے۔ الیکشن کمیشن نے انتخابی ضابطہ اخلاق کی خلاف ورزی کرنے والوں کے خلاف سخت کارروائی کی وارننگ جاری کی ہے۔
کل ووٹنگ ہوگی اور الیکشن کمیشن کے مطابق قومی اسمبلی کے حلقے این اے 18 ہری پور، این اے 96 فیصل آباد، این اے 104 فیصل آباد، این اے 129 لاہور، این اے 143 ساہیوال اور این اے 185 ڈی جی خان میں ووٹ ڈالے جائیں گے۔ صوبائی اسمبلی کے حلقے پی پی 98 بھکر، پی پی 115 اور 116 فیصل آباد، پی پی 73 سرگودھا، پی پی 87 میانوالی، پی پی 203 ساہیوال اور پی پی 269 مظفرگڑھ میں بھی کل انتخابات ہوں گے۔
وزارت داخلہ نے 23 نومبر کو ضمنی انتخابات کے دن سول آرمڈ فورسز اور پاک فوج کی تعیناتی کا آرڈر جاری کر دیا ہے۔ نوٹیفکیشن کے مطابق عام فورسز دوسرے درجے پر کوئیک ری ایکشن فورس کے طور پر تعینات رہیں گی، جبکہ پاکستانی فوج تیسرے درجے پر کوئیک ری ایکشن فورس کے طور پر موجود ہوگی۔
الیکشن کمیشن نے بھی کل کے ضمنی انتخابات کے لیے پاکستان آرمی، سول آرمڈ فورسز اور مقامی پولیس کی تعیناتی کا نوٹیفکیشن جاری کیا ہے اور نامزد عسکری و سول افسران کو مجسٹریٹ درجہ اول کے اختیارات تفویض کیے گئے ہیں۔
