چیئرمین پاکستان پیپلزپارٹی بلاول بھٹو زرداری نے بھارت کو سخت پیغام دیتے ہوئے کہا ہے کہ اگر بھارت نے سندھ طاس معاہدے کو تسلیم نہ کیا، تو پاکستان ایک اور جنگ کے لیے تیار ہے، اور اس بار "چھ دریا ہمارے ہوں گے”۔
کراچی ایئرپورٹ پر کارکنان سے خطاب کرتے ہوئے بلاول بھٹو نے کہا کہ دریائے سندھ صرف ایک دریا نہیں بلکہ پوری تہذیب کا نشان ہے۔ "سندھ طاس ہمارے لیے زندگی کا مسئلہ ہے، ہم سندھو تہذیب کے وارث ہیں اور اپنے دریاؤں کا دفاع کرنا جانتے ہیں۔”
بلاول کا کہنا تھا کہ پاکستان نے ہمیشہ مثبت اور اصولی سیاست کی، اقوامِ متحدہ میں مؤثر انداز میں اپنا مقدمہ پیش کیا اور عالمی سطح پر پاکستان کا مؤقف بھارت کے جھوٹے بیانیے پر غالب رہا۔ انہوں نے خبردار کیا کہ بھارت کے پاس اب صرف دو راستے ہیں: یا تو سندھ طاس معاہدے کو تسلیم کرے، یا ایک اور جنگ کے لیے تیار ہو جائے۔
بلاول نے کہا کہ اگر بھارت نے پاکستان کو جنگ پر مجبور کیا تو تاریخ دہرائی جائے گی، اور اس بار چھ دریا پاکستان کا حصہ ہوں گے۔ ان کا کہنا تھا، "ہم نے پہلے بھی اپنی سرزمین اور پانیوں کا دفاع کیا ہے، آئندہ بھی کریں گے۔”
خطاب کے دوران انہوں نے ملک میں چند سیاسی جماعتوں پر تنقید کرتے ہوئے کہا کہ جب بھارت نے سندھ پر حملہ کیا تو یہ سیاسی یتیم خاموش تماشائی بنے رہے۔ "یہی لوگ ملک میں نفرت اور تقسیم کی سیاست کرتے ہیں، صوبوں کے درمیان دراڑیں ڈالنا ان کا پرانا وطیرہ ہے۔”
بلاول بھٹو نے الزام لگایا کہ بھارت مختلف تنظیموں کو فنڈنگ دے کر سندھ اور بلوچستان میں "نہ کھپے” جیسے نعرے لگواتا ہے تاکہ پاکستان کو اندرونی طور پر کمزور کیا جا سکے، لیکن ان کے بقول، "انہیں معلوم ہونا چاہیے کہ یہاں پیپلزپارٹی موجود ہے اور عوام ان سازشوں کو ناکام بنائیں گے۔”
اپنے خطاب کے اختتام پر بلاول نے کہا کہ 2025 کے انتخابات میں پیپلزپارٹی ایک بار پھر سیاسی یتیموں کو عبرتناک شکست دے گی۔ انہوں نے اعلان کیا کہ "جو لوگ بھارت کے حملے پر خاموش ہیں، عوام انہیں کبھی معاف نہیں کریں گے۔”
یہ بیان ایسے وقت پر سامنے آیا ہے جب خطے میں پانی کے مسئلے پر پاکستان اور بھارت کے درمیان کشیدگی میں اضافہ دیکھنے میں آ رہا ہے، اور عوامی سطح پر بھی اس معاملے پر شدید ردِعمل پایا جا رہا ہے۔
