پشاور: خیبر پختونخوا کے مشیر اطلاعات بیرسٹر سیف نے وزیر اعلیٰ پنجاب مریم نواز کو سیلابی صورتحال سے نمٹنے کے لیے علی امین گنڈاپور سے ٹیوشن لینے کا مشورہ دے دیا ہے۔
اپنے حالیہ بیان میں بیرسٹر سیف نے کہا کہ مریم نواز کو غیر قانونی ہاؤسنگ سوسائٹیز کے خلاف عملی کارروائی کرنی چاہیے اور عوامی نقصانات کا ازالہ کرنے کے لیے اثاثے منجمد کر کے مناسب اقدامات کرنے چاہئیں۔ ان کا مزید کہنا تھا کہ مریم نواز کو سیلابی صورتحال سے نمٹنے کے لیے علی امین گنڈاپور سے گائیڈنس لینی چاہیے۔
یہ مشورہ بیرسٹر سیف نے اس وقت دیا جب جولائی 2025 میں بھی انہوں نے مریم نواز کو ترقیاتی کاموں کے حوالے سے علی امین گنڈاپور سے ٹیوشن لینے کا مشورہ دیا تھا۔
اس دوران انہوں نے لاہور میں ہونے والی بارشوں کا ذکر کرتے ہوئے کہا کہ لاہور ایک بار پھر پانی میں ڈوبا ہوا ہے اور وزیر اعلیٰ پنجاب پر تنقید کرنا اب ایک جرم بن چکا ہے۔
بیرسٹر سیف نے مزید کہا کہ مریم نواز کو زبردستی نعرے لگوانے کی بجائے اپنی کارکردگی پر توجہ دینی چاہیے۔ انہوں نے لاہور کی حالت زار کو مثال دیتے ہوئے کہا کہ تعفن اور بدبو کے باعث سڑکوں پر سانس لینا بھی دشوار ہو چکا ہے۔
پانی کی غیر متوقع مقدار آئی، لیکن کوئی جانی نقصان نہیں ہوا: مریم نواز
ان کا کہنا تھا کہ چند گھنٹوں کی بارش نے مریم نواز کے "پیرس” کا پول کھول دیا ہے، جہاں اقتدار میں کئی بار آنے کے باوجود لاہور کی حالت اب تک بہتر نہیں ہو سکی۔
