11
بہاولنگر کے علاقے بھوکاں پتن میں ایک افسوسناک واقعہ پیش آیا جہاں ایک نوجوان رات 2 بجے پل پر سیلفی لیتے ہوئے دریائے ستلج میں جاگرا۔ واقعے کے فوری بعد ریسکیو ٹیمیں جائے وقوعہ پر پہنچ گئیں اور تلاش کا عمل شروع کر دیا گیا۔
ریسکیو حکام کے مطابق دریا میں اس وقت اونچے درجے کا سیلاب ہے اور پانی کا بہاؤ انتہائی تیز ہے، جس کی وجہ سے تلاش میں شدید مشکلات کا سامنا ہے۔ نوجوان کی شناخت اور دیگر تفصیلات فوری طور پر سامنے نہیں آ سکیں۔
ریسکیو ٹیموں کا کہنا ہے کہ بارہا شہریوں کو خبردار کیا گیا ہے کہ سیلابی صورتحال کے دوران پلوں پر کھڑے ہو کر تصاویر نہ بنائیں، لیکن لوگ سنجیدگی کا مظاہرہ نہیں کرتے جس کے نتیجے میں ایسے افسوسناک واقعات پیش آتے ہیں۔
واضح رہے کہ حالیہ دنوں میں ہونے والی شدید بارشوں اور بھارت کی جانب سے اضافی پانی چھوڑنے کے بعد دریائے ستلج سمیت دیگر دریاؤں میں سیلابی کیفیت برقرار ہے، جس سے نشیبی علاقوں میں خطرات مزید بڑھ گئے ہیں۔ حکام نے شہریوں سے اپیل کی ہے کہ وہ احتیاطی تدابیر پر عمل کریں اور دریاؤں کے قریب جانے سے گریز کریں۔
