اسلام آباد، جاری پاک بھارت کشیدگی کے دوران آذربائیجان نے پاکستان کی مکمل حمایت کا اعلان کرتے ہوئے دوستی کا عملی مظاہرہ کیا ہے۔
تفصیلات کے مطابق آذربائیجان کی حکومت نے وزیراعظم پاکستان کو ایک خط لکھ کر خطے میں حالیہ کشیدگی پر گہری تشویش کا اظہار کیا اور بھارتی جارحیت کی سخت مذمت کی۔
پاکستان میں آذربائیجان کے سفیر خضر فرہادوف نے بھی حکومت پاکستان کے نام خصوصی پیغام جاری کیا جس میں آذربائیجان نے بھارت کی جانب سے کی جانے والی فوجی کارروائیوں پر شدید تحفظات ظاہر کیے اور پاکستانی قوم کے ساتھ مکمل یکجہتی کا اظہار کیا۔
آذربائیجان کی جانب سے جاری اعلامیے میں کہا گیا کہ وہ پاکستان کے ساتھ کھڑا ہے، اور مشکل وقت میں ہر ممکن تعاون فراہم کرے گا، اس کے ساتھ ہی متاثرہ خاندانوں سے تعزیت اور زخمیوں کی جلد صحتیابی کی دعا بھی کی گئی ہے۔
آذربائیجان نے دونوں ممالک پر زور دیا کہ موجودہ تنازع کو سفارتی ذرائع سے حل کیا جائے تاکہ خطے میں امن قائم رکھا جا سکے،ساتھ ہی پاکستان کی عوام کیلئے نیک تمناؤں کا اظہار بھی کیا گیا۔
