بلوچستان کے ضلع زیارت کے علاقے میں نامعلوم مسلح افراد نے اسسٹنٹ کمشنر زیارت محمد افضل درانی کو ان کے بیٹے منتصر باللہ کے ساتھ اغوا کر لیا۔
ڈپٹی کمشنر زیارت ذکا اللہ درانی کے مطابق اسسٹنٹ کمشنر اور ان کا بیٹا زیارت کے معروف سیاحتی مقام زیزری پر گئے ہوئے تھے کہ وہاں ان پر حملہ کیا گیا اور انہیں مسلح افراد نے اغوا کر لیا۔
حملہ آوروں نے ان کے ساتھ موجود گن مین اور ڈرائیور کو چھوڑ دیا، جبکہ اسسٹنٹ کمشنر کی سرکاری گاڑی کو نذر آتش کر دیا گیا۔ واقعے کی اطلاع ملتے ہی لیویز فورس اور دیگر قانون نافذ کرنے والے ادارے موقع پر پہنچ گئے اور اسسٹنٹ کمشنر اور ان کے بیٹے کی بازیابی کے لیے سرچ آپریشن شروع کر دیا گیا ہے۔
واضح رہے کہ اسسٹنٹ کمشنر افضل درانی دو ماہ بعد سرکاری ملازمت سے ریٹائر ہونے والے ہیں۔ یہ واقعہ علاقہ میں امن و امان کی صورتحال کے حوالے سے تشویش کا باعث بنا ہے اور متعلقہ حکام اس کی فوری تحقیقات کر رہے ہیں۔
