یوم آزادی پر فیلڈ مارشل سید عاصم منیر کا قوم سے خطاب، ملکی خودمختاری پر سمجھوتہ نہ کرنے اور کشمیری عوام کی مکمل حمایت کا اعلان۔
راولپنڈی، پاکستان کے 78 ویں یوم آزادی کے موقع پر فیلڈ مارشل سید عاصم منیر نے قوم کے نام خصوصی پیغام میں کہا ہے کہ پاک فوج روایتی، غیر روایتی اور ہائبرڈ خطرات سے نمٹنے کے لیے پوری طرح تیار ہے اور ملکی آزادی و خودمختاری پر کسی قسم کا سمجھوتہ نہیں کیا جائے گا۔
انہوں نے تمام اہل پاکستان کو مبارک باد پیش کرتے ہوئے قیامِ پاکستان کی جدوجہد میں قربانیاں دینے والے بزرگوں اور برصغیر کے مسلمانوں کو خراج تحسین پیش کیا۔
فیلڈ مارشل نے کہا کہ پاکستان عالم اسلام کا مضبوط اور ناقابلِ تسخیر قلعہ ہے، جہاں مذہبی اقلیتیں بھی قومی ترقی میں اپنا کردار ادا کر رہی ہیں۔ دہشتگردی کے خاتمے کیلئے پاکستان نے بے شمار جانی و مالی قربانیاں دیں اور پہلگام سانحے کی شدید مذمت کرتے ہوئے عالمی تحقیقات کی پیشکش کی، مگر بھارت نے روایتی ہٹ دھرمی دکھاتے ہوئے شہری آبادی کو نشانہ بنایا۔ قوم کی حمایت سے مسلح افواج نے بھارتی جارحیت کا بھرپور جواب آپریشن "بُنْيَانٌ مَّرْصُوْص” کے ذریعے دیا جو افواج پاکستان کی بہادری کی علامت ہے۔
وزیراعظم کا یوم آزادی پر قوم سے خطاب، بھارت پر تاریخی فتح جشن کا حصہ قرار
انہوں نے کہا کہ پاکستان خطے میں امن و ترقی چاہتا ہے مگر ملکی سالمیت پر آنچ نہیں آنے دے گا اور کسی بھی مہم جوئی کا فوری اور منہ توڑ جواب دیا جائے گا۔
فیلڈ مارشل نے کشمیری عوام کی جدوجہد آزادی کی مکمل حمایت کا عزم دہرایا اور کہا کہ حقِ خود ارادیت ہی مسئلہ کشمیر کا واحد پائیدار حل ہے۔
انہوں نے فلسطینی عوام کے ساتھ یکجہتی کا اظہار کرتے ہوئے عالمی برادری سے ان کے حقوق کے تحفظ کیلئے فوری اقدامات کا مطالبہ کیا۔ فیلڈ مارشل نے کہا کہ پاک فوج کی پیشہ ورانہ مہارت اور جنگی تیاری پر مکمل اعتماد ہے اور وطن کی سرحدوں کی حفاظت کیلئے کسی قربانی سے دریغ نہیں کیا جائے گا۔
یاد رہے کہ فیلڈ مارشل سید عاصم منیر نے متعدد مواقع پر اس عزم کا اعادہ کیا ہے کہ پاک فوج ہر قسم کے داخلی و خارجی خطرات سے نمٹنے کی مکمل صلاحیت رکھتی ہے اور پاکستان کے دفاع، استحکام اور ترقی کیلئے ہمہ وقت تیار ہے۔
