راولپنڈی، صدرِ مملکت آصف علی زرداری نے گوجرانوالہ کنٹونمنٹ کا دورہ کیا، جہاں ان کا استقبال آرمی چیف جنرل سید عاصم منیر نے کیا۔
آئی ایس پی آر کے مطابق صدر کے ہمراہ وفاقی وزیر داخلہ محسن نقوی بھی موجود تھے جبکہ کور کمانڈر گوجرانوالہ اور منگلا بھی اس موقع پر شریک تھے۔
دورے کے دوران صدر مملکت نے معرکۂ حق کی کامیابی پر پاک افواج کی اعلیٰ پیشہ ورانہ صلاحیتوں کو سراہا اور دشمن کی بلااشتعال جارحیت کے خلاف عسکری عزم و حوصلے کی بھرپور تعریف کی۔
آصف علی زرداری نے مادرِ وطن کے تحفظ کے لیے جان کا نذرانہ دینے والے سویلین اور فوجی شہداء کو شاندار خراج عقیدت پیش کرتے ہوئے کہا کہ ان کی قربانیاں ہمارے لیے ایک مقدس امانت اور قومی فخر کا باعث ہیں۔
انہوں نے کہا کہ پاکستان کی سرزمین کے سپوت قوم کے جذبے کے تحت جواں ہمتی اور آپریشنل حکمتِ عملی سے دشمن کے منصوبوں کو ناکام بناتے ہیں اور صرف چند گھنٹوں میں دشمن کی جارحیت کو پسپا کرکے ملک کی قوت، یکجہتی اور عزم کا عملی مظاہرہ کیا گیا۔
افسران اور جوانوں سے گفتگو کے دوران صدر نے ان کے عزم، تیاری اور پیشہ ورانہ جذبے کو سراہتے ہوئے کہا کہ وہ قوم کے ان محافظوں پر فخر محسوس کرتے ہیں۔
صدر مملکت نے آپریشن "بُنیان مرصوص” کی کامیابی پر مبارکباد پیش کی اور کہا کہ پاکستانی عوام اپنے جانباز سپاہیوں کو وطن کی خودمختاری کے اصل محافظ سمجھتے ہیں اور ان کی قربانیوں کو دل سے سراہتے ہیں۔
