اسفندیار ولی کا پی ٹی آئی رکن اسمبلی کو 10 کروڑ روپے ہرجانے کا نوٹس

پشاور، عوامی نیشنل پارٹی (اے این پی) کے رہنما اسفندیار ولی نے پاکستان تحریک انصاف کے رکن صوبائی اسمبلی شفیع جان کو 10 کروڑ روپے ہرجانے کا نوٹس بھیج دیا۔

نوٹس کے مطابق 22 اگست کو شفیع جان نے اسمبلی اجلاس کے دوران تقریر میں اسفندیار ولی پر الزامات عائد کیے اور بعد ازاں اس تقریر کی ویڈیو اپنے ذاتی فیس بک پیج پر بھی شیئر کی۔

نوٹس میں مزید کہا گیا ہے کہ شفیع جان 15 دن کے اندر معافی مانگیں اور ویڈیو کو اپنے سوشل میڈیا پیج سے ڈیلیٹ کریں، بصورت دیگر ان کے خلاف قانونی کارروائی کی جائے گی۔

یاد رہے کہ کوہاٹ سے منتخب پی ٹی آئی رکن صوبائی اسمبلی شفیع جان نے حالیہ دنوں میں ایوان کے اندر تقریر کے دوران اسفندیار ولی کو تنقید کا نشانہ بنایا تھا۔