سرگودھا کی انسدادِ دہشت گردی عدالت نے 9 مئی کے مقدمے میں عدم پیشی پر پی ٹی آئی رہنماؤں کے وارنٹ گرفتاری جاری کر دیے۔
سرگودھا کی انسدادِ دہشت گردی عدالت میں 9 مئی کو جوڈیشل کمپلیکس میانوالی میں ہونے والی ہنگامہ آرائی، توڑ پھوڑ اور گھیراؤ جلاؤ سے متعلق مقدمات کی سماعت ہوئی، تاہم عدالت کے بارہا طلبی کے باوجود کوئی بھی نامزد ملزم پیش نہ ہوا۔
عدم پیشی پر عدالت نے پاکستان تحریکِ انصاف کے رہنما و اپوزیشن لیڈر پنجاب اسمبلی ملک احمد خان بھچر، بلال اعجاز اور احمد چٹھہ سمیت 51 نامزد افراد کے وارنٹ گرفتاری جاری کر دیے۔ عدالت نے عمر ایوب کے خلاف اشتہاری قرار دینے کی کارروائی کا بھی آغاز کر دیا۔ عدالت نے مزید سماعت 29 جولائی تک ملتوی کرتے ہوئے تمام ملزمان کو طلبی کے نوٹس جاری کر دیے۔ دورانِ سماعت 9 مئی کے چار دیگر مقدمات میں عدالت نے گواہوں کی شہادتیں بھی قلمبند کیں۔
واضح رہے کہ 9 مئی کے پرتشدد واقعات کے دوران میانوالی کے جوڈیشل کمپلیکس پر حملے کے مقدمے میں 57 نامزد اور 150 نامعلوم افراد کو شاملِ تفتیش کیا گیا تھا، جن پر سنگین نوعیت کی دفعات کے تحت مقدمات درج ہیں۔
یاد رہے کہ 9 مئی 2023 کو چیئرمین پی ٹی آئی کی گرفتاری کے بعد ملک بھر میں پرتشدد مظاہرے پھوٹ پڑے تھے، جن میں اہم سرکاری و عسکری تنصیبات کو نشانہ بنایا گیا تھا۔ میانوالی میں جوڈیشل کمپلیکس پر حملے کے واقعے نے ان مقدمات میں حساسیت اور شدت کو مزید بڑھا دیا۔
