آرمی چیف فیلڈ مارشل سید عاصم منیر نے قصور سیکٹر، جلالپور پیر والا اور ملتان میں قائم فلڈ ریلیف کیمپس کا دورہ کیا۔ انہوں نے سیلاب متاثرین سے ملاقات کی اور ان کی دوبارہ آبادکاری و بحالی میں مکمل تعاون کی یقین دہانی کرائی۔
پاک فوج کے شعبہ تعلقات عامہ (آئی ایس پی آر) کے مطابق، آرمی چیف کو سیلاب کی موجودہ صورتحال، ریسکیو آپریشنز، اور امدادی سرگرمیوں سے متعلق بریفنگ دی گئی۔ ان کے ہمراہ چیف سیکرٹری پنجاب اور دیگر اعلیٰ سول حکام بھی موجود تھے۔
فیلڈ مارشل عاصم منیر نے کہا کہ ریاست ہر سال قیمتی جانوں اور املاک کے نقصان کی متحمل نہیں ہو سکتی، اور اس سے بچنے کے لیے درکار اقدامات اور انفراسٹرکچر کی ترقی کو تیز کرنا ناگزیر ہے۔
انہوں نے سول و فوجی اداروں کے باہمی تعاون کی اہمیت پر زور دیتے ہوئے کہا کہ سیلاب متاثرین کے مسائل کا حل اچھی طرزِ حکمرانی اور عوام دوست ترقیاتی حکمت عملی میں پوشیدہ ہے۔
آرمی چیف نے محفوظ مقامات پر منتقل کیے گئے متاثرین سے بھی ملاقات کی اور ان کے مسائل سنے۔ اس موقع پر انہوں نے کہا کہ پاک فوج عوامی فلاح و بہبود کے لیے ہر ممکن مدد فراہم کرنے کے عزم پر قائم ہے۔
کمشنر راولپنڈی کا فلڈ ریلیف کیمپ کا دورہ، ریسکیو آپریشن کی کارکردگی کو سراہا
انہوں نے ریلیف آپریشنز میں مصروف فوجی جوانوں، ریسکیو 1122 کے اہلکاروں اور پولیس افسروں سے بھی ملاقات کی، اور ان کے بلند حوصلے، تیاری، اور مشکل حالات میں خدمات کو سراہا۔
آئی ایس پی آر کے مطابق، فیلڈ مارشل نے زور دیا کہ سیلاب کی تباہ کاریوں سے بچنے کے لیے نہ صرف وقتی ریلیف بلکہ مستقل حل کے لیے طویل المدتی منصوبہ بندی ضروری ہے۔
