اسلام آباد: سابق وزیراعظم عمران خان اور ان کی اہلیہ بشریٰ بی بی کے حق میں اقوام متحدہ کے خصوصی نمائندہ برائے تشدد، ڈاکٹر ایلس ایڈورڈز کے پاس دو باضابطہ اپیلیں جمع کرائی گئی ہیں۔ یہ اطلاع زلفی بخاری نے مائیکرو بلاگنگ ویب سائٹ ایکس پر دی ہے۔
زلفی بخاری کے مطابق عمران خان کے بیٹے سلیمان خان اور قاسم خان نے اپنے والد کے لیے اپیل دائر کی ہے جبکہ مریم وٹو نے اپنی بہن بشریٰ بی بی کے حق میں اپیل جمع کروائی ہے۔ ان اپیلوں میں عمران خان اور بشریٰ بی بی کی غیر قانونی حراست اور غیر انسانی سلوک کی شدید مذمت کی گئی ہے۔
زلفی بخاری نے کہا ہے کہ پاکستان کی تاریخ میں پہلی بار کسی سیاسی قیدی کی اہلیہ کو بھی صرف حوصلہ شکن کرنے کے لیے قید کیا گیا ہے، جو ایک افسوسناک اور غیر آئینی اقدام ہے۔ انہوں نے مزید کہا کہ قوم عمران خان کے ساتھ ڈٹ کر کھڑی ہے اور اس جدوجہد میں کسی بھی قسم کی پسپائی نہیں ہوگی۔
عمران خان کو ایک اور مقدمے میں سزا سنانے کی تیاری کی جا رہی ہے:علیمہ خان
یہ اپیل اقوام متحدہ کے پلیٹ فارم پر عمران خان اور بشریٰ بی بی کی حفاظت اور ان کے حقوق کے لیے ایک اہم قدم سمجھا جا رہا ہے، جس کے ذریعے عالمی سطح پر ان کی صورتحال کو اجاگر کیا جائے گا اور انصاف کے تقاضے پورے کرنے پر زور دیا جائے گا۔
