ملک کے مختلف حصوں میں اینٹی نارکوٹکس فورس (اے این ایف) کی جانب سے منشیات فروشوں کے خلاف مؤثر کارروائیاں کی گئیں، جن کے دوران مجموعی طور پر 12 کروڑ 36 لاکھ روپے سے زائد مالیت کی 200 کلوگرام منشیات برآمد کرلی گئی ہیں۔ ان کارروائیوں کے دوران افغان شہری اور خاتون سمیت 9 افراد کو گرفتار کر لیا گیا۔
چناب ٹول پلازہ گجرات کے قریب ایک خاتون سے 4.32 کلوگرام ہیروئن اور 400 گرام آئس برآمد کی گئی، جب کہ اٹک میں ایک یونیورسٹی کے قریب موٹر سائیکل سوار سے 600 گرام چرس برآمد ہوئی، جو طلبہ کو فروخت کی جا رہی تھی۔ دونوں ملزمان نے تعلیمی اداروں کے طلبہ کو نشانہ بنانے کا اعتراف بھی کیا۔
کراچی کے جناح انٹرنیشنل ایئرپورٹ پر ریاض جانے والے مسافر کے سامان سے مٹھائی کے ڈبوں میں چھپائی گئی 13 ہزار زینیکس گولیاں برآمد ہوئیں۔ اسی طرح طارق روڈ پر واقع ایک کوریئر آفس سے برطانیہ بھیجے جانے والے پارسل میں 1.62 کلوگرام ہیروئن برآمد کی گئی۔
لاہور کے کینال روڈ پر ایک کوریئر آفس میں آسٹریلیا بھیجے جانے والے پارسل سے 990 گرام آئس برآمد ہوئی، جسے کپڑوں میں بھگو کر جوتوں کے اندر چھپایا گیا تھا۔ چکلالہ گیریژن، راولپنڈی میں کھلونوں کے اندر سے 14 گرام ویڈ برآمد ہوئی۔
سرائے عالمگیر: انسداد تجاوزات کارروائی، 3 دکانیں سیل
اٹک میں کامرہ روڈ پر ایک گاڑی سے 2.59 کلوگرام ہیروئن اور 2.1 کلوگرام آئس برآمد ہوئی جبکہ افغان باشندے سمیت دو ملزمان کو گرفتار کیا گیا۔ تھاکوٹ کے قریب ہزارہ ایکسپریس وے پر 14.4 کلوگرام چرس، اور کوئٹہ کے لک پاس ٹول پلازہ پر 5 کلوگرام آئس برآمد ہوئی۔
سب سے بڑی کارروائی کوئٹہ کے ویسٹرن بائی پاس پر کی گئی، جہاں 86 کلوگرام ہیروئن اور 80 کلوگرام چرس قبضے میں لی گئی۔ تمام ملزمان کے خلاف انسداد منشیات ایکٹ 1997 کے تحت مقدمات درج کر کے تحقیقات کا آغاز کر دیا گیا ہے۔
