اے این ایف نے اسلام آباد، لاہور، پشاور سمیت مختلف شہروں میں کارروائی کرتے ہوئے تعلیمی اداروں میں منشیات سپلائی کرنے والے 6 افراد کو گرفتار کر لیا، 26.4 کلوگرام سے زائد نشہ آور مواد برآمد
کراچی: اینٹی نارکوٹکس فورس (اے این ایف) نے ایک اہم اور حساس کارروائی کرتے ہوئے تعلیمی اداروں کے طلبہ کو منشیات فراہم کرنے والے چھ ملزمان کو گرفتار کر لیا ہے۔ اے این ایف کے ترجمان کے مطابق یہ کارروائیاں اسلام آباد، مانسہرہ، لاہور، پشاور اور حب سمیت مختلف شہروں میں کی گئیں، جن میں مجموعی طور پر 9 آپریشن شامل تھے۔
ترجمان کے مطابق ان کارروائیوں کے دوران مجموعی طور پر 26.437 کلوگرام منشیات برآمد کی گئی، جن میں 19.580 کلوگرام چرس، 5.013 کلوگرام آئس، 864 گرام ہیروئن، 25 گرام کلونازپام بھرے کیپسول، 360 گرام وزنی آئس بھرے 50 کیپسول، 500 گرام افیون، اور 95 گرام آئس بھرا کیپسول شامل ہیں۔ یہ تمام نشہ آور مواد انتہائی خطرناک اور نوجوان نسل کے لیے تباہ کن قرار دیا جاتا ہے۔
گرفتار ملزمان نے تفتیش کے دوران اعتراف کیا ہے کہ وہ مختلف تعلیمی اداروں میں زیر تعلیم نوجوانوں کو منشیات فروخت کرتے تھے۔ ان کے خلاف انسدادِ منشیات ایکٹ کے تحت مقدمات درج کر لیے گئے ہیں، اور مزید تفتیش کا دائرہ کار بڑھا دیا گیا ہے تاکہ اس مکروہ دھندے میں ملوث دیگر عناصر کو بھی قانون کی گرفت میں لایا جا سکے۔
اے این ایف کے ترجمان نے کہا ہے کہ نوجوانوں کو نشے جیسے ناسور سے بچانے کے لیے ملک بھر میں کریک ڈاؤن جاری رکھا جائے گا، اور تعلیمی اداروں میں منشیات کے نیٹ ورک کو جڑ سے ختم کرنا فورس کی اولین ترجیح ہے۔
یاد رہے کہ گزشتہ چند برسوں میں پاکستان کے مختلف شہروں میں تعلیمی اداروں میں منشیات کے پھیلاؤ پر تشویش کا اظہار کیا جا رہا ہے۔ متعدد بار ایسے نیٹ ورکس کو بے نقاب کیا جا چکا ہے جو نوجوان نسل کو منشیات کی لت میں مبتلا کرنے میں ملوث پائے گئے۔ اے این ایف کی حالیہ کارروائی اسی سلسلے کی ایک کڑی ہے، جس کا مقصد تعلیمی ماحول کو محفوظ اور صحت مند بنانا ہے۔
