اینٹی نارکوٹکس فورس (اے این ایف) کی رپورٹ کے مطابق انسداد منشیات کے دوران 421 ملزمان کو گرفتار کیا گیا جبکہ 26 مختلف گینگز کے خلاف کارروائی کی گئی ہے۔
سینیٹر ثمینہ زہری کی صدارت میں قائمہ کمیٹی برائے انسانی حقوق کا اجلاس منعقد ہوا۔
اجلاس میں اے این ایف کے کرنل مصعب نے تعلیمی اداروں میں منشیات کے استعمال کو روکنے کے حوالے سے تفصیلی بریفنگ دی۔
رپورٹ میں بتایا گیا کہ گزشتہ سال ملک بھر میں انسداد منشیات کی مہم شروع کی گئی، جس کے تحت دو مرحلوں میں آپریشن کیے گئے۔
پہلے مرحلے میں 255 جامعات میں منشیات کے خلاف کارروائی کی گئی جبکہ دوسرے مرحلے میں 363 آپریشنز کے دوران 421 منشیات فروشوں کو گرفتار کیا گیا اور 26 گینگز کا خاتمہ کیا گیا، اس دوران 1420 کلوگرام منشیات بھی برآمد ہوئی۔
کمیٹی کے اراکین نے اے این ایف حکام سے تعلیمی اداروں میں منشیات کی روک تھام کے حوالے سے وزارت کی کارکردگی پر سوالات کیے۔
چیئرپرسن چائلڈ رائٹس کمیشن عائشہ رضا فاروق نے کہا کہ بچوں کو اسکول کی سطح پر منشیات سے بچانا ضروری ہے کیونکہ یونیورسٹی لیول پر روکنا مشکل ہوتا ہے، انہوں نے کہا کہ منشیات کی سپلائی میں مافیاز شامل ہیں، اس لیے بچوں کو پکڑنے کی بجائے مسئلے کی جڑ کو ختم کرنا چاہیے۔
عائشہ رضا فاروق نے اسکولوں میں منشیات کے پھیلاؤ کو روکنے کے لیے نیشنل ایکشن پلان کی ضرورت پر زور دیا اور بتایا کہ ایک سرکاری اسکول کے استاد نے دعویٰ کیا کہ منشیات دیواروں کے ذریعے اسکول میں بھی داخل کی جا رہی ہیں۔
