اسلام آباد کی سیشن عدالت نے وزیر اعلیٰ خیبر پختونخوا علی امین گنڈاپور کے خلاف جاری شراب و اسلحہ برآمدگی کیس میں عدم پیشی پر ایک بار پھر وارنٹ گرفتاری جاری کرتے ہوئے 17 ستمبر کو عدالت میں گرفتار کر کے پیش کرنے کی ہدایت جاری کر دی۔
کیس کی سماعت جوڈیشل مجسٹریٹ مبشر حسن کی عدالت میں ہوئی، جہاں علی امین گنڈاپور کی جانب سے کوئی نمائندہ یا وکیل پیش نہیں ہوا۔
عدالت نے غیر حاضری پر برہمی کا اظہار کرتے ہوئے کہا کہ متعدد بار وارنٹس جاری کیے جا چکے ہیں، مگر ملزم پیش نہیں ہوا۔ اس لیے عدالت نے گرفتاری کے وارنٹ دوبارہ جاری کرتے ہوئے پولیس کو ہدایت کی ہے کہ ملزم کو گرفتار کر کے مقررہ تاریخ پر عدالت میں پیش کیا جائے۔
یاد رہے کہ علی امین گنڈاپور کے خلاف تھانہ بارہ کہو میں مقدمہ درج کیا گیا تھا، جس میں ان پر شراب اور اسلحہ برآمد ہونے کا الزام ہے۔ اس کیس میں اس سے قبل بھی کئی مرتبہ وارنٹ گرفتاری جاری کیے جا چکے ہیں، مگر وہ تاحال عدالت میں پیش نہیں ہوئے۔
