اختر مینگل کو دبئی روانگی سے قبل ایف آئی اے نے پرواز سے آف لوڈ کر دیا، نام پی این آئی ایل میں شامل ہونے کی تصدیق
کوئٹہ سے موصولہ اطلاعات کے مطابق بلوچستان نیشنل پارٹی (بی این پی) کے سربراہ اور قومی اسمبلی کے رکن سردار اختر مینگل کو دبئی جانے والی نجی ایئر لائن کی پرواز سے آف لوڈ کر دیا گیا ہے۔
ایف آئی اے حکام کے مطابق ان کا نام پرویژنل نیشنل آئیڈنٹیفکیشن لسٹ (PNIL) میں شامل ہے، جس کے باعث انہیں امیگریشن مرحلے پر روک دیا گیا۔
اختر مینگل نے اس حوالے سے ردعمل دیتے ہوئے کہا کہ وہ دبئی کے لیے روانہ ہو رہے تھے کہ ایف آئی اے امیگریشن اسٹاف نے انہیں آگاہ کیا کہ ان کا نام فہرست میں شامل ہے، لہٰذا سفر کی اجازت نہیں دی جا سکتی۔ انہوں نے سوشل میڈیا پلیٹ فارم پر بھی اس واقعے کی تصدیق کی اور اس پر شدید تحفظات کا اظہار کیا۔
بی این پی کے سینئر رہنما اور سابق وفاقی وزیر آغا حسن بلوچ نے اس اقدام کو شدید تنقید کا نشانہ بنایا اور اسے غیر قانونی و غیر آئینی قرار دیا۔ ان کے ساتھ پارٹی رہنما غلام نبی مری نے بھی بیان دیتے ہوئے کہا کہ سردار اختر مینگل اب بھی قومی اسمبلی کے رکن ہیں اور ان کا استعفیٰ منظور نہیں ہوا، اس لیے ان کے بنیادی شہری حقوق سلب کرنا قابلِ مذمت ہے۔ دونوں رہنماؤں نے مطالبہ کیا کہ حکومت فوری طور پر اختر مینگل کا نام PNIL سے نکالے اور انہیں آئینی طور پر بیرون ملک سفر کی اجازت دی جائے۔
یاد رہے کہ پرویژنل نیشنل آئیڈنٹیفکیشن لسٹ ایک عبوری فہرست ہے جس میں مشتبہ یا زیرِ تفتیش افراد کے نام شامل کیے جاتے ہیں تاکہ ان کے بیرون ملک سفر پر عارضی طور پر پابندی لگائی جا سکے۔ تاہم، اس فہرست میں شفافیت اور عدالتی جانچ کے بغیر کسی کو شامل کرنے پر ماضی میں بھی تنقید کی جاتی رہی ہے۔
