پشاور، مشیر اطلاعات خیبرپختونخوا بیرسٹر ڈاکٹر سیف نے کہا ہے کہ امن و امان کے قیام میں افغانستان کا کردار کلیدی ہے۔
صوبائی مشیر اطلاعات بیرسٹر ڈاکٹر سیف نے افغان سفیر سردار احمد شکیب سے ملاقات کی، جس میں باہمی دلچسپی کے امور پر تفصیلی تبادلہ خیال کیا گیا اور خطے میں امن و استحکام کے لیے دونوں ممالک کے کردار پر بھی گفتگو ہوئی۔
ملاقات کے دوران خیبرپختونخوا حکومت کی طرف سے امن کے قیام کے لیے اٹھائے جانے والے اقدامات پر بھی تفصیلی بات چیت ہوئی، جبکہ تجارت اور معیشت کی مضبوطی کے حوالے سے بھی اہم امور زیر بحث آئے۔ بیرسٹر ڈاکٹر سیف نے کہا کہ وزیراعلیٰ علی امین گنڈاپور کی قیادت میں صوبائی حکومت دہشت گردی کے خاتمے کے لیے سنجیدہ اقدامات کر رہی ہے اور افغانستان کا تعاون اس میں اہم کردار ادا کرے گا۔
افغان سفیر سردار احمد شکیب نے طورخم بارڈر پر تجارتی سہولیات بڑھانے کی ضرورت پر زور دیا۔ اس موقع پر بیرسٹر ڈاکٹر سیف نے کہا کہ تجارت بڑھانے اور معیشت کو مضبوط بنانے سے خطے میں امن اور خوشحالی کے فروغ میں مدد ملے گی، اور عوام کی سہولت کے لیے معاشی اور تجارتی سرگرمیوں کی بحالی ناگزیر ہے۔ انہوں نے بتایا کہ وزیر اعلیٰ خیبرپختونخوا نے افغان عوام کی سہولت کے لیے کینسر ہسپتال کی تعمیر کا وعدہ بھی کیا ہے۔
صوبائی مشیر اطلاعات نے مزید کہا کہ افغانستان کے سرحدی علاقوں میں سولر ٹیوب ویل فراہم کیے جائیں گے، اور خطے کی ترقی باہمی اعتماد اور تعاون سے ممکن ہے۔
