27
اسلام آباد: قومی اسمبلی میں اپوزیشن اتحاد نے باقاعدہ طور پر محمود خان اچکزئی کو قائدِ حزبِ اختلاف نامزد کر دیا ہے۔
نجی ٹی وی آج نیوز کے مطابق اپوزیشن کی جانب سے یہ درخواست سیکرٹری قومی اسمبلی مشتاق کے دفتر میں جمع کرائی گئی، جسے چیف وِپ عامر ڈوگر، اسد قیصر اور دیگر رہنماؤں نے پیش کیا۔
ذرائع کے مطابق درخواست پر اپوزیشن کے 74 اراکینِ اسمبلی کے دستخط موجود ہیں، جنہوں نے متفقہ طور پر محمود خان اچکزئی پر اعتماد کا اظہار کیا۔ تاہم، پی ٹی آئی کے تین اراکین بیرونِ ملک ہونے کے باعث دستخط نہ کر سکے۔
اپوزیشن اتحاد کے اس اقدام کے بعد محمود خان اچکزئی باضابطہ طور پر قومی اسمبلی میں اپوزیشن کی قیادت کریں گے اور حکومت کے خلاف مشترکہ حکمتِ عملی تشکیل دینے میں اہم کردار ادا کریں گے۔
سیکرٹری قومی اسمبلی کے دفتر میں درخواست جمع کرانے کے بعد اب ان کی باضابطہ تقرری کا عمل مکمل ہو چکا ہے، اور وہ اسمبلی میں اپوزیشن کے نمائندہ قائد کی حیثیت سے اپنے فرائض انجام دیں گے۔
