راولپنڈی، جی ایچ کیو حملہ اور 9 مئی کے 13 مقدمات کی سماعت ایک بار پھر مؤخر کر دی گئی، تاہم عدالت نے ملزمان پر فرد جرم عائد کرنے کے لیے نئی تاریخ مقرر کر دی ہے۔
انسداد دہشت گردی کی عدالت میں ان مقدمات کی سماعت جج امجد علی شاہ نے کی، جس میں سرکاری پراسیکیوٹر، ملزمان کے وکیل ملک فیصل اور ان کی ٹیم کے ساتھ ساتھ تمام نامزد افراد عدالت میں پیش ہوئے۔
عدالتی کارروائی کے دوران رکن قومی اسمبلی شاندانہ گلزار، سابق وفاقی وزیر داخلہ اور عوامی مسلم لیگ کے رہنما شیخ رشید احمد، سپرنٹنڈنٹ اڈیالہ جیل، زرتاج گل، علیمہ خان اور دیگر افراد بھی عدالت میں موجود تھے۔ شیخ رشید حاضری لگانے کے بعد واپس روانہ ہو گئے۔
سماعت کے دوران جی ایچ کیو حملہ کیس کے گواہوں کی غیر حاضری کے باعث جیل ٹرائل دوبارہ مؤخر کر دیا گیا۔ دوسری جانب 26 نومبر کو تحریک انصاف کے احتجاج سے جڑے 23 مقدمات میں ملزمان کو چالان کی نقول فراہم کر دی گئیں۔
اسی طرح سانحہ 9 مئی کے 11 مقدمات میں بھی عدالت میں پیش ہونے والے ملزمان کو چالان کی کاپیاں دے دی گئیں۔
بعد ازاں عدالت نے 26 نومبر کے احتجاج سے متعلق 32 کیسز کی سماعت آئندہ تاریخ 3 جون تک ملتوی کر دی، اس روز ملزمان پر فردِ جرم عائد کی جائے گی۔
