کوئٹہ، وزیراعلیٰ بلوچستان میر سرفراز بگٹی کا کہنا ہے کہ قومی سطح پر ثقافتوں کو اجاگر کر کے ہی قومی یکجہتی کو فروغ دیا جا سکتا ہے۔
وزیر اعلیٰ بلوچستان میر سرفراز بگٹی سے صوبائی وزراء میر صادق عمرانی، بخت محمد کاکڑ، پارلیمانی سیکرٹری نوابزادہ زرین خان مگسی نے خصوصی ملاقات کی، صوبائی وزراء کی جانب سے عوامی مسائل کے حل کے لئے اٹھائے گئے اقدامات اور محکموں کے انتظامی امور سے آگاہی دی گئی ۔
صوبائی وزیر صحت بخت محمد کاکڑ کی جانب سے وزیر اعلیٰ بلوچستان کو پشتون روایتی پگڑی کا تحفہ پیش کیاگیا، میر سرفراز بگٹی نے صوبائی وزرا کو پشتون ثقافتی ڈے کی مبارکباد دی۔
اس موقع پر گفتگو کے دوران وزیراعلیٰ میر سرفراز بگٹی نے کہا کہ ثقافت ہر علاقے کی پہچان کو اجاگر کرنے میںایک غیر معمولی کردار ادا کررہی ہے ، پشتون کی ثقافت ہمیں محبت اور رواداری کا درس دیتی ہے، قومی سطح پر ثقافتوں کو اجاگر کر کے ہی قومی یکجہتی کو فروغ دیا جا سکتا ہے۔
میر سرفراز بگٹی نے کہا کہ ملک میں بسنے والی تمام قومیں قومی جذبے کیساتھ پاکستان کی ترقی اور خوشحالی میں اپنا کردار ادا کر رہی ہیں، صوبائی وزراء، پارلیمانی سیکرٹریز اور اراکین اسمبلی عوام کو درپیش مسائل کے حل کیلئے بھی عملی اقدامات کررہی ہیں۔
سرفراز بگٹی نے کہا کہ محکموں کو فعال کرکے سروس ڈلیوری بہتر بنائیں گے، گورننس کو بہتر کرکے عوام کے مسائل کا حل ممکن ہے۔
