راولپنڈی، سربراہ عوامی مسلم لیگ اور سابق وفاقی وزیر داخلہ شیخ رشید احمد کا کہنا ہے کہ اسپیکر قومی اسمبلی کا ضمیر زندہ ہے تو استعفی دیں، ورنہ کوئی ایک ممبر ہی ان کے خلاف تحریک عدم اعتماد پیش کرے، بھلے یہ تحریک ناکام ہو جائے۔
میڈیا سے گفتگو کے دوران سربراہ عوامی مسلم لیگ شیخ رشید نے کہا کہ اس طرح منشیات فروشوں کو نہیں پکڑا جاتا جس طرح پارلیمنٹ سے ایم این ایز کو پکڑا گیا، 30 ستمبر کی ڈیڈ لائن کی بات پر قائم ہوں آپ کو پتہ لگ جائے گا یہ میثاق جمہوریت کرنے جا رہے ہیں، پاکستان میں جمہوریت نام کی کوئی چیز نہیں ہے۔
شیخ رشید کا کہنا تھا کہ 50 ارب روپے کا بجلی پر مزید ٹیکہ لگا دیا ہے، مردوں کو اور مار رہے ہیں۔
سابق وفاقی وزیر کا یہ کہنا تھا کہ ملک تباہ و برباد ہوگیا ہے، غریب زندہ مر گیا ہے، تعلیم کا یہ حال ہے کہ جہاں 3 ہزار بچیاں پڑھتی تھیں اب وہاں 3 سو بچیاں پڑھتی ہیں، یہ نالائق و نکھٹو ہیں، اداروں کو جس طرح بدنام کیا جا رہا ہے وہ افسوسناک ہے۔
سربراہ عوامی مسلم لیگ نے کہا کہ اصل حکومت سے مطالبہ کرتا ہوں دیہاڑی دار مزدوروں کو کیسز سے نکال دیں، لوگوں کو ساری سمجھ ہے لیکن حالات کے ہاتھوں مجبور ہیں۔
شیخ رشید کا یہ کہنا تھا کہ 40 دن کا چلہ کاٹا، بہتر تھا 4 سال جیل کاٹ لیتا، جن کے ساتھ ساری زندگی دوستی رہی، انہوں نے مجھے بھی معاف نہیں کیا۔
سابق وفاقی وزیر کا کہنا تھا کہ آپ کا کیا خیال ہے، چاروں صوبوں میں جمہوری راج ہے یہ اقتدار کے بھوکے ہیں، انہیں یہ معلوم ہی نہیں کہ عوام کے ہاتھوں کتنے ذلیل ہوچکے ہیں، وزیراعلیٰ علی امین گنڈا پور دوست ہیں اڈیالہ جیل سے سابق وزیراعظم عمران خان کو نکالنے کی بات کا جواب نہیں دوں گا۔
