شمالی وزیرستان،شمالی وزیر ستان انتظامیہ کو دہشت گردوں کی ممکنہ نقل و حرکت کی اطلاع ملنے کے بعد سکیورٹی خدشات کی وجہ سے رزمک، میرم شاہ اور میرعلی میں آج (اتوار) کے لیے کرفیو نافذ کردیا گیا۔
ضلعی حکام کا بتانا ہے کہ آج اتوار کی صبح 6 بجے سے شام 6 بجے تک میرم شاہ سے بنوں تک، کوٹ پل سے ڈنکین تک اور میلوگئی پل تک کرفیو نافذ رہے گا۔
حکام کے مطابق سکیورٹی وجوہات کی بنا پر کرفیو لگانا ضروری تھا، یہ اقدام احتیاطی تدبیر کو ملحوظ خاطر رکھتے ہوئے اٹھا یا گیا ہے ۔
انتظامیہ نے مقامی لوگوں پر زور دیا کہ وہ غیر ضروری نقل و حرکت سے گریز کریں اور علاقے میں امن برقرار رکھنے کے لئے سکیورٹی فورسز کے ساتھ تعاون کریں۔
سکیورٹی اداروں کیطرف سے صورتحال پر مسلسل نظر رکھی جا رہی ہے، دوسری جانب مقامی افراد نے حکم نامے پر تحفظات کا اظہار کرتے ہوئے کہا کہ کرفیو کے دوران تجارتی سرگرمیاں معطل ہوگئی ہیں۔
یاد رہے کہ کرفیو ایک حفاظتی اقدام ہوتا ہے جو حکومت اس وقت نافذ کرتی ہے جب امن و امان کو خطرہ لاحق ہو۔ اس کا مقصد عوام کی جان و مال کا تحفظ اور حالات کو قابو میں رکھنا ہوتا ہے، کرفیو عام طور پر فسادات، دہشت گردی، پُرتشدد مظاہروں یا وبائی امراض کے دوران لگایا جاتا ہے تاکہ غیر ضروری نقل و حرکت روکی جا سکے اور حالات بہتر بنائے جا سکیں۔
