گورنر سندھ کامران ٹیسوری کا کہنا تھا کہ پہلے بھی کئی مرتبہ عہدے سے ہٹانے کی باتیں ہوتی رہی ہیں، لیکن کبھی دھیان نہیں دیا۔
گورنر سندھ کامران ٹیسوری کا کہنا ہے کہ 22 ماہ میں متعدد بار عہدے سے ہٹانے کی باتیں کی گئیں لیکن میں ان باتوں پر دھیان نہیں دیتا بلکہ مزید بہتر منصوبے شروع کر دیتا ہوں۔
پریس کانفرنس کرتے ہوئے گورنر سندھ کامران ٹیسوری کا کہنا تھا کہ اب تک 1 روپیہ بھی تنخواہ نہیں لی، گھروالوں کے اخراجات بھی خود برداشت کرتا ہوں۔
گورنر سندھ نے کہا کہ کارساز روڈ حادثے میں جاں بحق باپ بیٹی کے ورثا کیساتھ کھڑے ہیں، انہیں وکیل کی بھی آفر کی گئی ہے۔
اپنی پریس کانفرنس میں گفتگو کے دوران کامران ٹیسوری کا کہنا تھا کہ حیدرآباد کے آئی ٹی ٹیسٹ میں 90 ہزار میں سے 54 ہزار بچے پاس ہو گئے ہیں، اگلا ٹیسٹ اب سکھر میں ہوگا۔
واضح رہے کہ کچھ روز قبل بھی گورنر سندھ کامران ٹیسوری کو عہدے سے ہٹا کر ان کی جگہ پاکستان مسلم لیگ ن سندھ کے صدر بشیر میمن کو گورنر لگائے جانے کی افوہیں سوشل میڈیا پر گردش کررہی تھیں۔
