لاہور، گورنر سندھ کامران ٹیسوری کا کہنا ہے کہ پاکستانی معیشت ترقی کرنے جارہی ہے، ہم سب اس میں اپنا حصہ ڈالیں گے۔
گورنر سندھ کامران ٹیسوری کا داتا دربار پر حاضری کے موقع پر میڈیا سے گفتگو کرتے ہوئے یہ کہنا تھا کہ پاکستان کی سر بلندی کیلئے داتا دربار پر دعا کی گئی، اللہ رب العزت نے جس دن منصب پر بٹھایا اس وقت سے کوشش ہے ہم اپنے عوام کے لیے بہترین فرائض سر انجام دیں۔
گورنر سندھ کا کہنا ہے کہ مجھے لگ رہا ہے پاکستان ترقی کرے گا کیونکہ اس وقت اقتدار میں موجود لوگوں کے درمیان سیاسی جنگ نہیں ہے، میں وزیراعلیٰ مریم نواز کے لیے بھی خصوصی طور پر دعا گو ہوں کہ وہ پنجاب کے عوام کے لیے احسن طریقے سے کام کریں۔
گورنر سندھ کا یہ کہنا تھا کہ آرمی چیف پاکستان کی سرحدوں کی حفاظت کر رہے ہیں، سپہ سالار پاکستانی معیشت کو بہتر بنانے میں بھی کردار ادا کر رہے ہیں۔
گورنر سندھ کامران ٹیسوری نے کہا کہ جو جذبہ یہاں موجود محبان رسول ﷺ میں ہے ان کے ہوتے ہوئے پاکستان کی طرف میلی آنکھ سے دیکھنے والوں کی آنکھیں نکال لی جائیں گی، پاکستان کی معیشت ترقی کرنے جا رہی ہے، ہمیں چاہیے کہ اس میں کردار ادا کریں۔
