پشاور، گورنر خیبر پختونخوا فیصل کریم کنڈی کی عدم موجودگی کی وجہ سے صوبائی کابینہ میں مزید تقرریاں رک گئیں۔
سرکاری ذرائع کا کہنا ہے کہ وزیر اعلیٰ کے پی علی امین گنڈا پور نے 1 مشیر اور 4 معاونین خصوصی کی تقرری کی سمری گورنرکے پی کو بھیجی تھی جو انہیں 26 اگست کو موصول ہوئی تھی۔
سرکاری ذرائع کے مطابق گورنر نے تاحال سمری پر دستخط نہیں کیے، گورنر فیصل کریم کنڈی گزشتہ 1 ہفتے سے شہر سے باہر ہیں۔
ذرائع کا کہنا ہے کہ وزیراعلیٰ کے پی علی امین گنڈا پور کی جانب سے احتشام علی کو مشی، پیر مصور غازی، سہیل آفریدی، نیک محمد اور ہمایوں خان کو بطور معاونین خصوصی کابینہ میں شامل کرنے کی سمری گورنر کے پی کو بھیجی گئی تھی۔
اس حوالے سے میڈیا سے گفتگو کرتے ہوئے وزیر قانون خیبر پختونخوا آفتاب عالم کا یہ کہنا تھا گورنر کے پاس سمری گئی ہے لیکن گورنر موجود نہیں ہیں، گورنر اپنی آئینی ذمہ داری چھوڑ کر سیاست کرنے میں لگے ہیں۔
آفتاب عالم نے کہا کہ گورنر ریاستی امور کو نقصان پہنچا رہے ہیں، گورنر اپنی ذمہ داری پوری کرنے کے بجائے ٹاک شوز میں تجزیے کرتے ہیں۔
