وفاقی وزیر داخلہ محسن نقوی نے کہا کہ آئی جی اسلام آباد سمیت افسران، اہلکاروں کے حوصلے بلند ہیں، تحریک انصاف سے کل اپیل کی تھی یہ احتجاج کا موقع نہیں ہے۔
اسلام آباد میں وفاقی وزیر داخلہ محسن نقوی نے پی ٹی آئی کے ڈی چوک دھرنے سے متعلق گفتگو کرتے ہوئے کہا کہ مجھے یہ اندازہ ہے کہ راستے بند ہونے سے شہریوں کو پریشانی ہے جس پر میں معذرت خواہ ہوں، ہر سیاسی جماعت کو احتجاج کا حق حاصل ہے۔
محسن نقوی کا کہنا تھا کہ ہرسیاسی جماعت کو احتجاج کا حق ہے لیکن اس طریقے سے نہیں،ہرپاکستانی کواظہاری رائے کا حق ہے لیکن ان دنوں اجازت نہیں دیں گے، جس طریقے سے احتجاج کیا جارہا ہے، اسکی اجازت نہیں دی جائے گی۔
محسن نقوی کا کہنا تھا کہ تحریک انصاف والے احتجاج کے معاملے پر نظرثانی کریں، ویڈیوز میں دیکھا جاسکتا ہے کہ جو آرہے ہیں ان کے پاس ہتھیار بھی ہیں۔
وزیر داخلہ کا کہنا تھا کہ وزیراعلیٰ خیبرپختونخوا پہلے پاکستانی پھر کسی جماعت کے رکن ہیں، انہیں ذمہ داری کا مظاہرہ کرنا چاہیے، غیر ملکی مہمانوں کو ہمیں یہ یقین دلانا ہوگا کہ پاکستان محفوظ ملک ہے، علی امین گنڈا پور وفاقی دارالحکومت اسلام آباد پر دھاوا بولنے آرہے ہیں۔
محسن نقوی کا کہنا تھا کہ پولیس، قانون نافذ کرنے والے ادارے، انتظامیہ اپنی ذمہ داری پوری کریں گے، کسی کی خواہش پر پورا ملک بند نہیں کرسکتے، کسی ایک پولیس افسر اور اہلکار کے پاس ہتھیار نہیں ہے، ہتھیار صرف ایس پی کے پاس ہے، لیکن وہ بھی استعمال نہیں کر سکتے۔
