129
کراچی ائیرپورٹ کے قریب چینی باشندوں پر حملے کے لیے استعمال ہونیوالی گاڑی کا پتہ چل گیا۔
چینی باشندوں پر خود کش حملے کی تحقیقات میں بڑی پیشرفت منظرعام پر آئی ہے، تفتیشی حکام نے کہا کہ دھماکے میں استعمال کی گئی گاڑی کا ریکارڈ مل گیا ہے۔
تفتیشی حکام کے مطابق خودکش حملے میں استعمال ہونے والی گاڑی جس کے نام تھی اس کا نادرا ریکارڈ مل گیا ہے، گاڑی کی تفصیلات چیسز نمبر سے حاصل ہوئیں۔
تفتیشی حکام کا کہنا ہے کہ نادرا ریکارڈ کے تناظر میں تحقیقات کا دائرہ بلوچستان تک پھیلا دیا گیا ہے۔
حکام کا کہنا ہے کہ گاڑی جس شخص کے نام تھی اس کی شناختی دستاویزات حاصل کرلی گئی ہیں، مذکورہ شخص کی زیر استعمال سمز کا ڈیٹا بھی حاصل کرلیا گیا ہے۔
واضح رہے کہ گزشتہ روز کراچی ائیر پورٹ کے قریب چینی شہریوں کے قافلے پر حملہ ہوا تھا جس کے نتیجے میں 2 چینی باشندوں سمیت 3 افراد جان کی بازی ہار گئے جبکہ 17 افراد شدید زخمی ہو گئے۔
