پشاور، مشیر اطلاعات خیبر پختونخوا بیرسٹر سیف کا کہنا ہے کہ چیف الیکشن کمشنر آف پاکستان کیخلاف آرٹیکل 6 کے تحت مقدمہ دائر ہونا چاہیے۔
سپریم کورٹ کی جانب سے جاری کیے گئے مخصوس نشستوں سے متعلق کیس کے تفصیلی فیصلے پر ردعمل کا اظہار کرتے ہوئے مشیر اطلاعات پختونخوا بیرسٹر سیف کا کہنا ہے کہ اعلیٰ عدلیہ کے تفصیلی فیصلے کے بعد الیکشن کمیشن فی الفور مخصوص نشستوں کا نوٹیفکیشن جاری کرے۔
بیرسٹر سیف کا کہنا تھا کہ تفصیلی فیصلے کے بعد الیکشن کمیشن کے پاس اگر مگر کا کوئی آپشن باقی نہیں رہتا، اعلیٰ عدلیہ کی جانب سے الیکشن کمیشن کے یکم مارچ کے فیصلے کو آئین سے متصادم قرار دے دیا گیا ہے، آئین کی خلاف ورزی پر چیف الیکشن کمشنر کے خلاف کارروائی ضرور ہونی چاہیے۔
مشیر اطلاعات کے پی، کا کہنا تھا کہ آرٹیکل 6 کے تحت چیف الیکشن کمشنر کے خلاف مقدمہ دائر ہونا چاہیے، اعلیٰ عدلیہ کا حکم نہ ماننے پر وزیراعظم اور الیکشن کمیشن توہین عدالت کے مرتکب ہوتے ہیں، تفصیلی فیصلے میں پاکستان تحریک انصاف کی بطور سیاسی جماعت وضاحت دی گئی ہے۔
رہنما پی ٹی آئی نے کہا کہ جعلی حکومت کا پی ٹی آئی کے خاتمے کا خواب کبھی شرمندہ تعبیر نہ ہو گا، ملک میں تمام تر فساد کی جڑ الیکشن کمشنر ہے، ان سے پورا پورا حساب لیا جانا چاہیے۔
