اسلام آباد، چیئرمین پاکستان تحریک انصاف بیرسٹر گوہر علی کو رہا کردیا گیا۔
نجی ٹی وی چینل کے مطابق پولیس کے حوالے سے یہ بتایا گیا ہے کہ چیئرمین بیرسٹر گوہر کو تھانہ سنگجانی میں درج مقدمے سے ڈسچارج کردیا گیا۔
واضح رہے کہ گزشتہ روز پی ٹی آئی کے رہنماؤں کو پارلیمنٹ ہاؤس سے حراست میں لیا گیا تھا، جس میں بیرسٹر گوہر بھی شامل تھے، ایم این ایز کی گرفتاری پر سپیکر ایاز صادق کی جانب سے نوٹس لے کر آئی جی اسلام آباد کو تحقیقات کا حکم دیدیا گیا ہے۔
دوسری جانب چیئرمین پشتونخوا ملی عوامی پارٹی محمود خان اچکزئی کا کہنا ہے کہ جمہوری اور غیر جمہوری قوتوں کی لڑائی پہلے سے جاری تھی لیکن اب کھل کر سامنے آ گئی۔
قومی اسمبلی کے اجلاس کے دوران گفتگو کے دوران محمود خان اچکزئی کا کہنا تھا کہ جمہوری اور غیر جمہوری قوتوں کی لڑائی میں ہم جمہوری صفوں میں کھڑے ہوں گے۔
محمود خان اچکزئی نے کہا کہ ہم نے پاکستان کے آئین کے دفاع کا حلف لیا تھا،جتنی بھی قربانیاں دینی پڑیں ،ہم قربانیاں دیں گے، ہم دیکھیں گے کہ میدان میں کون قربانی دیتا ہے۔
