وفاقی وزیر اطلاعات و نشریات عطا تارڑ نے کہا ہے کہ پی ٹی ایم کے فتنہ الخوارج اور افغان طالبان سے روابط ہیں۔
وفاقی وزیر اطلاعات و نشریات عطا تارڑ کا کہنا ہے کہ پی ٹی ایم کے کالعدم ٹی ٹی پی (فتنہ الخوارج) اور افغان طالبان سے روابط ہیں، دہشت گرد تنظیموں سے رابطے کی بنا پر پابندی لگانے کا فیصلہ کیا گیا۔
اسلام آباد میں پریس کانفرنس کے دوران عطا تارڑ کا کہنا تھا کہ پشتون تحفظ موومنٹ کو بیرونی فنڈنگ مل رہی ہے اور ان کا بیانیہ پاکستان مخالف بیانیہ ہے، پی ٹی ایم سے منسلک افغان شہریوں کی جانب سے پاکستانی سفارتخانے پر حملہ کیا گیا اور پرچم کی بے حرمتی کی گئی۔
وفاقی وزیر اطلاعات نے کہا کہ پی ٹی ایم کو کسی بھی طرح کا تعاون فراہم کرنا ممنوع ہے، تنظیم کے دہشت گرد گروپوں سے رابطے اور فنڈنگ کی تحقیقات جارہی ہیں۔
ٓعطاتارڑ نے کہا کہ کسی بھی تنظیم کو ثبوتوں کی بنیاد پر کالعدم قرار دیا جاتا ہے، یہ دیکھا جاتا ہے کہ ان کی فنڈنگ کہاں سے ہورہی ہے اور ان کے محرکات کیا ہیں۔
وفاقی وزیر اطلاعات کا کہنا تھا کہ سفارتخانوں سے جھنڈے اتارنے کی اجازت نہیں دی جاسکتی، پی ٹی ایم نے پاکستان کے جھنڈے کو نذر آتش کیا۔
