لاہور، وزیر اطلاعات پنجاب عظمیٰ بخاری کا کہنا ہے کہ جلسے میں کسی فتنہ فساد کی کوشش ہوئی تو کارروائی ہوگی۔
لاہور میں میڈیا سے گفتگو کے دوران صوبائی وزیراطلاعات عظمیٰ بخاری کا کہنا تھا کہ رات کو تحریک فساد کا پھر چہرہ دیکھا گیا، آگ لگانا بھی کیا کسی سیاسی جماعت کا ٹریک ریکارڈ ہوسکتا ہے۔
عظمی بخاری کا کہنا تھا کہ پی ٹی آئی والے صرف گند ہی ڈال سکتے ہیں، کیا سیاسی جماعتیں اسلحہ لے کر آتی ہیں؟ علی امین گنڈا پور کے واٹس ایپ گروپ پر دکھایا جارہا ہے کہ کارکنان ڈنڈوں اور اسلحے کیساتھ نکل رہے ہیں، وزیراعلیٰ کے پی، ریسکیو 1122 کی گاڑیاں لے کر نکل رہے ہیں۔
صوبائی وزیراطلاعات کا کہنا تھا کہ علی امین گنڈاپور کھل کر جلسہ کریں، جلسے میں کسی کی طبیعت خراب ہوئی تو اس کو ائیر ایمبولینس کے ذریعے اسپتال پہنچادیں گے، وزیراعلیٰ کے پی کرینیں لیکر آ رہے ہیں، آج کسی مریض کا پختونخوا میں بیمار ہونا منع ہے۔
عظمی بخاری نے کہا کہ کسی کو قانون ہاتھ میں لینے کی اجازت ہرگز نہیں دی جائے گی، 6 بجے تک جلسہ ختم کرنے کی ذمے داری منتظمین پر عائد ہوتی ہے، علی امین گنڈا پور تحریری معذرت نہ کریں جلسے میں اگر معافی مانگ لیں، تو ہم قبول کر لیں گے۔
ن لیگی رہنما نے کہا کہ اگر کوئی 9 مئی کا اشتہاری جلسہ گاہ میں موجود ہوگا یا فتنہ، فساد کی کوشش کرے گا تو آہنی ہاتھوں سے نمٹا جائے گا اور قانون اپنا رستہ اختیار کرے گا، کوئی سڑک بند نہیں اور نہ ہوگی، وزیراعلیٰ پنجاب مریم نواز کی واضح ہدایات ہیں کہ ان کو قانون کے دائرے میں جلسہ کرنے کی اجازت دی جائے گی۔
