اسلام آباد، چئیرمین پاکستان تحریک انصاف (پی ٹی آئی) بیرسٹر گوہر علی خان کا کہنا ہے کہ پی ٹی آئی سانحہ 10 ستمبر کبھی نہیں بھولے گی، 10 ستمبر پاکستان کی جمہوریت کا سیاہ دن مانا جائے گا۔
چیئرمین پی ٹی آئی بیرسٹر گوہر نے رہائی کے بعد میڈیا سے گفتگو کرتے ہوئے یہ کہا کہ میں نے پارلیمنٹ میں خود گاڑی سے باہر آکر گرفتاری دی۔ ہمارے لوگوں کو نقاب پوشوں کی جانب سے حراست میں لیا گیا اور لوگوں کی گرفتاری کو ہم پارلیمان پر حملہ سمجھتے ہیں۔
بیرسٹر گوہر کا کہنا تھا کہ مجھے گرفتار کرکے تھانے میں رکھا گیا اور بعد میں مجھے بتایا گیا کہ آپ کی گرفتاری مطلوب نہیں تھی۔
چیئرمین بیرسٹر گوہر کا یہ کہنا تھا کہ انتخابات میں دھاندلی کے باوجود ہم پارلیمان میں رہے اور ہم پارلیمان میں عوام کی اصل نمائندگی چاہتے تھے۔
لاہور جلسے کے متعلق گفتگو کرتے ہوئے چیئرمین پی ٹی آئی بیرسٹر گوہر کا کہنا تھا کہ ہمارے جلسے آئین و قانون کے مطابق ہوں گے اور ہمارے جلسوں کے شیڈول میں کوئی تبدیلی نہیں ہوئی۔
چیئرمین بیرسٹر گوہر کا کہنا تھا کہ پاکستان کا ہر شہری پارلیمان پر حملے کی مذمت کرتا ہے، ایوان کی توہین ہوئی ہے اور اسپیکر پر لازم ہے کہ کارروائی کریں۔
چیئرمین پی ٹی آئی بیرسٹر گوہر کا کہنا تھا کہ پی ٹی آئی کے گرفتار رہنماؤں کا جسمانی ریمانڈ عدالت میں چیلنج کریں گے۔
