اسلام آباد، مسلم لیگ ن کے رہنما طلال چودھری نے کہا کہ تحریک انصاف (پی ٹی آئی) دھڑے بندی کا شکار ہوچکی اور حکومت میں آنے کیلئے این آر او مانگ رہی ہے۔
میڈیا سے گفتگو کے دوران رہنما مسلم لیگ ( ن) طلال چودھری کا کہنا تھا کہ پی ٹی آئی الگ الگ گروپوں میں منقسم ہوتی جارہی ہے اور یہ تقسیم پیسوں کی بندر بانٹ پر ہے، اب کوئی علیمہ، کوئی بشریٰ اور کوئی گنڈاپور گروپ ہے۔
ن لیگی رہنما نے کہا کہ سڑکیں بنانے کے پیسے وزیراعلیٰ کے پی کی جیب میں جارہے ہیں، خود کو انقلابی کہنے والے خود ٹوٹ پھوٹ کا شکار ہیں۔
طلال چوہدری نے پی ٹی آئی پر تنقید کرتے ہوئے یہ کہا کہ یہ غلطی کی نشاندہی کرنے والے کو فارغ کردیتے ہیں، پہلے شکیل خان نے جو شکایت لگائی تو وہ فارغ ہوگئے، ان کا پورا بیانیہ ہی کرپشن اور الزامات پر کھڑا ہے، آج کل 190 ملین پاؤنڈ کیس سے دوڑ رہے ہیں۔
طلال چودھری نے کہا کہ جلسوں اور دھرنوں کی دھمکیاں دیتے ہیں، جیسے ہی سکینڈل آیا علیمہ خان نے پشاور کا دورہ کیا، جب بھی بات کریں گے این آراو اور سزاؤں سے بچنے کیلئے، یہ تماشہ لوگ دیکھ رہے ہیں اور ہنس رہے ہیں۔
ان کا کہنا تھا کہ جب بھی حکومت میں بیٹھنے کی بات کرے گی یہ این آر او کی بات کریں گے یہ ان چیزوں کی بات کریں گے جس کا حقیقت سے کوئی تعلق نہیں، خیبرپختونخوا میں دہشتگردی کی پی ٹی آئی نے کبھی مذمت نہیں کی، ذمہ داری نبھانے کے بجائے پاکستان کو عدم استحکام کا شکار کرنے کی کوشش کرتے ہیں۔
