پیٹرولیم مصنوعات کی قیمتوں میں کمی کے بعد پنجاب ٹرانسپورٹ کے کرایوں میں 30 سے 70 روپے تک کمی کر دی گئی ہے۔
صوبائی وزیر اطلاعات پنجاب عظمیٰ بخاری نے کہا کہ جب پیٹرول کی قیمت میں کمی ہوتی ہے، وزیراعلیٰ مریم نواز اور ان کی ٹیم کرایوں میں کمی کے لیے متحرک ہوتے ہیں، وزیراعلیٰ اس بات کو یقینی بناتی ہیں کہ کرایوں میں ہر صورت کمی ہو۔
صوبائی وزیر اطلاعات کا کہنا ہے کہ پیٹرول سستا ہونے پر پنجاب کے علاوہ کسی صوبے میں آج تک کرایوں میں کمی نہیں ہوئی، پنجاب وہ واحد صوبہ ہے جہاں زائد وصول کیے گئے کرایے مسافروں کو واپس دلائے جاتے ہیں۔
عظمیٰ بخاری کا کہنا ہے کہ وزیراعلیٰ پنجاب مریم نواز کی ہدایات کے مطابق صوبے بھر میں ٹرانسپورٹ پر کرایوں میں کمی کا فوری اطلاق کر دیا گیا ہے، تمام بس اڈوں پر ضلعی انتظامیہ کرایوں کا شیڈول خود چیک کر رہی ہیں۔
صوبائی وزیراطلاعات کا کہنا ہے کہ وزیراعلیٰ پنجاب کی سختی سے ہدایات ہیں کہ مسافروں سے زائد کرایہ وصول کرنے والوں کے خلاف سخت ایکشن لیا جائے۔
عظمیٰ بخاری نے کہا کہ تمام ٹرانسپورٹرز کو بھی حکومت کے ساتھ تعاون کرنا چاہیے، وزیراعلیٰ مریم نواز کرایوں میں کمی کی تمام تر صورتحال کو خود مانیٹر کر رہی ہیں۔
