پنجاب کابینہ نے صوبہ بھر میں 7 ہزار سے زائد کالج ٹیچنگ انٹرنز بھرتی کرنے کی منظوری دے دی۔
وزیر اعلیٰ پنجاب مریم نواز کی زیر صدارت صوبائی کابینہ کا 16 واں اجلاس ہوا جس میں صوبائی وزراء، چیف سیکرٹری، آئی جی پنجاب، سیکرٹریز اور دیگر متعلقہ حکام شریک ہوئے۔
صوبائی کابینہ نے پنجاب بھر میں 7354 کالج ٹیچنگ انٹرنز بھرتی کرنے کی منظوری دے دی، وزیراعلیٰ پنجاب مریم نواز نے صوبہ بھر میں ہاؤسنگ کی جامع پالیسی بھی طلب کرلی۔
کابینہ ارکان کی جانب سے رحیم یار خان اور کچے کے علاقے میں ڈیوٹی کرنیوالے پولیس اہلکاروں کو خراج تحسین پیش کیا گیا، اجلاس میں ڈیوٹی کرنے والے پولیس اہلکاروں کیلئے خصوصی الاؤنس کی منظوری بھی دی گئی۔
اس موقع پر وزیراعلیٰ پنجاب مریم نواز نے صوبہ بھر میں ورکنگ ویمن کے ہاسٹل چارجز بڑھانے سے روک دیا، اجلاس میں پنجاب میں ایم ڈی کیٹ امتحانات کے پر امن انعقاد کو سراہا گیا، وزیر اعلیٰ پنجاب مریم نواز نے بصارت سے محروم خصوصی افراد کیلئے ماہانہ پیکج پلان بھی طلب کر لیا۔
پنجاب کابینہ کی جانب سے انڈومنٹ فنڈ فار رائٹرز ویلفیئر کیلئے 50 کروڑ روپے کے اجراء کی منظوری بھی دی گئی۔
