ترجمان آئی ایس پی آر لیفٹیننٹ جنرل احمد شریف چوہدری نے کہا کہ پاک فوج کا کسی قسم کا کوئی سیاسی ایجنڈا نہیں۔
راولپنڈی میں پریس کانفرنس کے دوران ڈی جی آئی ایس پی آر لیفٹیننٹ جنرل احمد شریف چوہدری نے کہا کہ فوج کا کسی حکومت کے ساتھ کوئی تعلق نہیں ہے، پاک فوج ایک قومی فوج ہے جس کا کوئی سیاسی ایجنڈا نہیں ہے۔
جنرل احمد شریف چوہدری نے کہا کہ فوج نا کسی سیاسی جماعت کے خلاف ہے اور نا ہی کسی سیاسی جماعت کے حق میں ہے، فوج کا حکومت پاکستان کیساتھ ایک پیشہ ورانہ اور سرکاری تعلق ہوتا ہے۔
جنرل احمد چوہدری کا کہنا تھا کہ فوج میں اگر کوئی ذاتی مفادات کے لیے کام کرتا ہے یا ذاتی فائدے کے لیے کسی مخصوص سیاسی ایجنڈے کو پروان چڑھاتا ہے تو پاک فوج کا خود احتسابی کا سسٹم حرکت میں آجاتا ہے، ثبوت و شواہد کی روشنی میں ذمہ داروں کو اپنے اعمال کا جوابدہ ہونا پڑتا ہے، خود احتسابی کا عمل ایک اور دلیل ہے۔
لیفٹیننٹ جنرل احمد شریف چوہدری نے کہا کہ پاک فوج میں واضح اتفاق رائے پایا جاتا ہے کہ فوج کو ایک ریاستی ادارے کے طور پر کسی بھی سیاسی مفاد کی تکمیل کے استعمال سے محفوظ رکھا جائے گا۔
جنرل احمد چوہدری نے کہا کہ لیفٹیننٹ جنرل فیض حمید کیس اس بات کا منہ بولتا ثبوت ہے کہ پاک فوج ذاتی اور سیاسی مفادات کے لیے کی گئی خلاف ورزیوں کو کتنا سنجیدہ لیتی ہے اور بلا امتیاز قانون کے مطابق فوری کارروائی کرتی ہے۔
لیفٹیننٹ جنرل احمد شریف چوہدری نے کہا کہ ہم یہ امید کرتے ہیں کہ اس طرح کی خود احتسابی دیگر قومی اداروں کو بھی ترغیب دیتی ہے کہ اگر کسی بھی سرکاری ادارے کا آفسر ادارے یا اپنے عہدے کو سیاسی و ذاتی مقاصد کیلئے استعمال کرے گا تو اسے جوابدہ ہونا پڑے گا ،ریاستی اداروں پر عوام کا اعتماد ہی اصل سرمایہ ہے۔
