14
اسلام آباد، وزیر مملکت برائے داخلہ طلال چودھری نے کہا ہے کہ پاکستان سے جعلی پاسپورٹ پر کسی کا سفر ممکن نہیں۔
قومی اسمبلی کی قائمہ کمیٹی برائے داخلہ کا اجلاس خرم شہزاد نواز کی سربراہی میں منعقد ہوا، جس میں انسانی سمگلنگ سے متعلق اقدامات پر غور کیا گیا۔
اس موقع پر اظہار خیال کرتے ہوئے طلال چودھری کا کہنا تھا کہ پاکستانی پاسپورٹ عالمی معیار کے مطابق ہے اور اس میں جعلسازی کی کوئی گنجائش نہیں، جبکہ انسانی سمگلنگ میں ملوث 200 افراد کو حراست میں لیا جاچکا ہے۔
زرتاج گل نے کہا کہ متعدد عرب ممالک نے ڈیرہ غازی خان کے شہریوں پر سفری پابندیاں عائد کر دی ہیں۔
اجلاس کے دوران نوشین افتخار نے استفسار کیا کہ کیا انسانی سمگلنگ یا ملک بدری کے شکار افراد کے خلاف کوئی کارروائی کی جاتی ہے؟ اس پر سیکریٹری داخلہ نے وضاحت کی کہ قانون موجود ہے اور انسانی سمگلنگ یا ڈی پورٹ ہونے والوں کے پاسپورٹ پانچ سال کے لیے معطل کر دیے جاتے ہیں۔
