اسلام آباد، وزیر خزانہ محمد اورنگزیب نے کہا ہے کہ پاکستان امریکا کے ساتھ معاشی تعاون کو وسعت دینے کا خواہشمند ہے اور اس سلسلے میں اعلیٰ سطحی سرکاری وفد جلد امریکا روانہ ہوگا۔
غیر ملکی میڈیا کو انٹرویو دیتے ہوئے وزیر خزانہ نے کہا کہ پاکستان امریکا سے کپاس اور سویابین کی درآمدات میں اضافہ چاہتا ہے جبکہ امریکی مصنوعات کو پاکستانی منڈیوں تک رسائی کے لیے غیر ٹیرف رکاوٹوں کے خاتمے پر بھی بات چیت جاری ہے۔
محمد اورنگزیب نے کہا کہ اگر امریکی مصنوعات پر غیر ضروری جانچ پڑتال کی جا رہی ہے تو اس پر نظرثانی کے لیے تیار ہیں، پاکستان میں امریکی سرمایہ کاری کو ہر ممکن سہولت فراہم کی جائے گی۔
انہوں نے واضح کیا کہ حکومت خصوصی طور پر معدنیات اور کان کنی کے شعبوں میں امریکی سرمایہ کاری کی حوصلہ افزائی کرے گی، پاکستان اپنی معیشت کو پائیدار ترقی کی راہ پر ڈالنے کے لیے عالمی مالیاتی اداروں سے تعاون حاصل کرنا چاہتا ہے۔
محمد اورنگزیب نے کہا کہ ہماری حکومت کا نصب العین معاشی استحکام ہے اور ہم پاکستان کو اقتصادی اتار چڑھاؤ کے چکر سے نکال کر مستحکم ترقی کی راہ پر گامزن کرنا چاہتے ہیں۔
