پشاور، وزیراعلیٰ خیبرپختونخوا علی امین گنڈا پور نے متعدد رہنماؤں کو وارننگ جاری کر دی۔
پارٹی ذرائع کا کہنا تھا کہ پی ٹی آئی خیبرپختونخوا پارلیمانی پارٹی کا اجلاس ہوا جس میں وزیراعلیٰ علی امین گنڈا پور کی جانب سے متعدد رہنماؤں کو وارننگ جاری کی گئی ہے۔
وزیراعلیٰ خیبرپختونخوا علی امین گنڈاپور کا کہنا تھا کہ ہر جلسہ سابق وزیراعظم عمران خان کی ہدایت پر منعقد ہو رہا ہے، کچھ رہنماؤں کی جلسوں میں عدم دلچسپی کی شکایات ہیں، ٹاسک کے مطابق ورکرز کو باہر نہ نکالنے کی شکایت ہے، سابق وزیراعظم عمران خان کیلئے جلسوں میں عدم دلچسپی نقصان دہ ہوسکتی ہے۔
علی امین گنڈا پور کا کہنا تھا کہ ہر جلسہ، جلوس کو کامیاب بنانا سب کی اولین ذمہ داری ہے، ہر رہنما کی کارکردگی دیکھ رہا ہوں، صحیح اور حقائق پر مبنی رپورٹ سابق وزیراعظم کو پیش کروں گا، پارٹی کیلئے قربانی آپ کے مستقبل کی سیاست پر نظر انداز ہوگی۔
وزیراعلیٰ کے پی نے ہدایت کی کہ لاہور کا جلسہ دور تھا، راولپنڈی احتجاج میں بھرپور انداز میں ورکرز کو نکالا جائے، ہر جلسہ اہم ہوتا ہے کسی جلسے کو غیر سنجیدہ نہ لیا جائے۔
علی امین گنڈا پور کی جانب سے ٹاسک دیتے ہوئے یہ کہا گیا کہ راولپنڈی کے لئے ہر ضلع سے نمائندہ 35 سے 45 گاڑیاں نکالے گا، قافلے پشاور سے 10 بجے نکلیں گے، تمام قافلے 11 بجے صوابی میں جمع ہونگے جہاں سے وزیراعلیٰ کے پی، کی قیادت میں راولپنڈی روانہ ہوں گے۔
