پشاور، وزیراعلیٰ خیبرپختونخوا علی امین گنڈاپور کی جانب سے آئینی ترامیم کی کھل کر مخالفت کردی گئی۔
پشاور میں میڈیا سے گفتگو کرتے ہوئے وزیراعلیٰ علی امین گنڈاپورکا کہنا تھا کہ اسلام امن کا پیغام دیتا ہے اور ہم پر امن لوگ ہیں، میری دعا ہے کہ اللہ تعالیٰ ہمارے دلوں سے نفرت ختم کردے۔
آئینی ترامیم پر بات کرتے ہوئے وزیراعلیٰ پختونخوا کا یہ کہنا تھا کہ یہ آئینی ترامیم جمہوریت پر حملہ ہے اور ہم اس کو کامیاب نہیں ہونے دیں گے، یہ لوگ جمہوریت کے ہوتے ہوئے ایسا بل کیسے لاسکتے ہیں۔
علی امین گنڈا پور کا کہنا تھا کہ ہم عدلیہ کے ساتھ کھڑے ہیں، ہم پارلیمنٹ میں ان کو شکست دیں گے، ہم اپنے جائز حق کے لیے کھڑے رہیں گے، ایسا بل پاس ہونا تو بہت دور کی بات ہے، انہیں پارلیمنٹ میں بھی اکثریت نہیں ملے گی۔
دوسری جانب اسلام آباد میں پاکستان تحریک انصاف (پی ٹی آئی) کے رکن قومی اسمبلی شیرافضل مروت نے میڈیا سے گفتگو کے دوران یہ کہا کہ اسلام آباد پولیس کو کہتا ہوں کہ اب اپنے الزامات کو ثابت بھی کرے، ثابت نہ کیا تو آئی جی اسلام آباد کیخلاف 193 کا استغاثہ درج کراؤنگا۔
تحریک انصاف کے رکن قومی اسمبلی شیرافضل مروت نے کہا کہ میری نقدی، پاور بینک اور دیگر چیزیں ابھی تک پولیس نے واپس نہیں کیں۔
