لاہور، پنجاب میں مسلم لیگ ن اور پاکستان پیپلز پارٹی کے مابین پاور شیئرنگ سے متعلق معاملات پر غور کے لیے دونوں جماعتوں کی خصوصی کمیٹیوں کے اجلاس کل طلب کر لیے گئے ہیں۔
ذرائع کے مطابق حکومتی اتحادی جماعتوں کا اہم اجلاس کل شام 4 بجے گورنر ہاؤس لاہور میں منعقد ہوگا، جہاں پاور شیئرنگ فارمولے پر تفصیلی تبادلہ خیال کیا جائے گا۔
مسلم لیگ ن کی جانب سے اجلاس میں رانا ثناء اللہ، اسپیکر پنجاب اسمبلی ملک محمد احمد خان اور سینئر وزیر مریم اورنگزیب شرکت کریں گے، جب کہ پاکستان پیپلز پارٹی کی نمائندگی گورنر پنجاب سردار سلیم حیدر، ندیم افضل چن، سید حسن مرتضیٰ، سید علی حیدر گیلانی اور سابق گورنر مخدوم سید احمد محمود کریں گے۔
ذرائع کے مطابق چیف سیکرٹری پنجاب زاہد اختر زمان، آئی جی پنجاب ڈاکٹر عثمان انور سمیت دیگر اعلیٰ افسران کی بھی اجلاس میں شرکت متوقع ہے۔
اجلاس میں صوبے میں پاور شیئرنگ سے متعلق اب تک ہونے والی پیش رفت کا جائزہ لیا جائے گا جبکہ کوآرڈینیشن کمیٹی کی ذیلی کمیٹیوں کی ملاقاتوں میں طے پانے والے امور پر مشاورت کی جائے گی۔
