مسلم لیگ (ن) اور پیپلز پارٹی کی جانب سے پنجاب کی ترقی اور عوامی ریلیف کے لیے سیاسی تعاون جاری رکھنے پر اتفاق کیا گیا ہے۔
لاہور میں مسلم لیگ (ن) اور پیپلز پارٹی کی کوآرڈینیشن کمیٹی کا اجلاس ہوا جس میں پی پی کی نمائندگی حسن مرتضیٰ، ندیم افضل چن اور حیدر گیلانی نے جبکہ وزیر اعلیٰ پنجاب کی نمائندگی سینیئر وزیر مریم اورنگزیب نے کی۔
پیپلزپارٹی کے رہنماؤں کی جانب سےعوام کی ترقی کے لیے وزیر اعلیٰ پنجاب مریم نواز کے اقدامات کو سراہا گیا۔
پی پی کے رہنماؤں نے کہا کہ عوام کو سولر سسٹم کی فراہمی میں اشتراک عمل سے آگے بڑھایا جائے گا، موسمیاتی چیلنجز سے نمٹنے، امن وامان اور آئی ٹی کے حوالے سے تعاون جاری رکھنے پر اتفاق کیا گیا ہے۔
اس موقع پررہنما پیپلزپارٹی علی حیدر گیلانی کا یہ کہنا تھا کہ عوامی ریلیف کے فارمولے پر اتفاق کرنے پر وزیراعلیٰ مریم نواز اور ن لیگ کے انتہائی مشکور ہیں، رکاوٹوں کو دور کرکے آگے بڑھنے سے ہی عوام کو اتحادی حکومت کے ثمرات ملیں گے۔
دوسری جانب رہنما ن لیگ مریم اورنگزیب کا یہ کہنا تھا کہ اتحادی جماعتوں کو ساتھ لے کر چلنے کی پالیسی پر کاربند ہیں جبکہ حسن مرتضیٰ کا کہنا تھا کہ اختلاف رائے ہمارا بنیادی حق ہے، عوامی ایشوز کو مل کرحل کرنے پر اتفاق کرتے ہیں۔
