142
مہمند میں ایف سی ہیڈ کوارٹر پر فتنہ الخوارج کے حملے کو ناکام بناتے ہوئے 4 خوارج کو جہنم واصل کردیا گیا۔
سکیورٹی فورسز کی جانب سے خیبر پختونخوا کے ضلع مہمند میں ایف سی ہیڈ کوارٹر پر فتنہ الخوارج کے حملے کی کوشش ناکام بنا دی گئی ہے۔
آئی ایس پی آر کے مطابق 6 ستمبر کی صبح 4 خوارج کے 1 گروپ کی جانب سے مہمند میں ایف سی ہیڈ کوارٹر پر حملے کی کوشش کی گئی۔
آئی ایس پی آر کا کہنا ہے کہ سکیورٹی فورسز کی جانب سے کیمپ میں داخلے کی کوشش ناکام بنا دی گئی اور چاروں خوارج خودکش بمباروں کو کسی قسم کا نقصان پہنچانے سے پہلے ہی ہلاک کر دیا گیا۔
ہلاک حملہ آوروں کے قبضے سے خودکش جیکٹس، ڈیٹونیٹر، اسلحہ اور بارودی مواد قبضے میں لے لیا گیا ہے۔
پاک فوج کے مطابق علاقے میں کسی اور خارجی کے خاتمے کے لیے کلیئرنس آپریشن بھی کیا گیا۔
ترجمان پاک فوج کے مطابق سکیورٹی فورسز ملک سے دہشتگردی کے ناسور کو جڑ سے اکھاڑ پھینکے کے لیے پرعزم ہے۔
