129
وزیراعلیٰ پنجاب مریم نواز کے احکامات کے مطابق پنجاب بھر میں اب لرنر پرمٹ کیساتھ ہی شہری ٹیسٹ دے کر لائسنس حاصل کرسکتے ہیں۔
سی ٹی او لاہور عمارہ اطہر کا کہنا ہے کہ اب موٹر سائیکل لائسنس حاصل کرنے کے لیے لرنر پرمٹ کے بعد انتظار نہیں کرنا پڑے گا۔
موٹر سائیکل لائسنس کے حصول کیلئے اب 42 یوم کا لرنر پریڈ ختم کیا جا رہا ہے۔
عمارہ اطہر کے مطابق شہری موٹر سائیکل کا لائسنس 1،2 یا 5 سال تک کے لیے بنوا سکتے ہیں، شفافیت کو یقینی بنانے کے لیے لائسنس سینٹرز میں کیش ہینڈلنگ کا بھی مکمل طور پر خاتمہ کردیا گیا ہے۔
سی ٹی او لاہور نے کہا کہ شہری لائسنس کے حصول کے لیے صرف شناختی کارڈ کے ہمراہ تشریف لائیں،ڈرائیونگ لائسنس کے تمام مراحل کی آڈیو/ویڈیو ریکارڈنگ کو بھی یقینی بنایا جا رہا ہے۔
عمارہ اطہر نے کہا کہ سہولت فراہم کرنے کا مقصد قیمتی وقت کو محفوظ اور شہریوں کو قانون پسند بنانا ہے، اس معاملے میں بغیر لائسنس ڈرائیونگ پر 2 ہزار روپے جرمانہ کیا جائے گا۔
