سربراہ عوامی مسلم لیگ شیخ رشید نے کہا ہے کہ مولانا فضل الرحمان نے کل آئینی ترمیم کے مسودے کا پہلا راؤنڈ جیت لیا ہے۔
راولپنڈی، سربراہ عوامی مسلم لیگ اور سابق وفاقی وزیر شیخ رشید احمد نے کہا ہے کہ مولانا فضل الرحمن نے کل آئینی ترمیم کے مسودے کا پہلا راؤنڈ جیت لیا۔
اپنے ایک بیان میں شیخ رشید کا کہنا تھا کہ ووٹ کو عزت دو کا نعرہ لگانے والوں نے ووٹ کا جمعہ بازار لگا رکھا ہے، کسی کے پاس آئینی مسودے کی کاپی نہیں، یہ عوام کو کیا اعتماد میں لیں گے۔
سابقہ وفاقی وزیر نے کہا کہ جمہوریت پر ہمیشہ رات کے اندھیرے میں شب خون مارا گیا۔
عوامی مسلم لیگ کے سربراہ اور سابق وفاقی وزیر کا یہ کہنا تھا کہ امید ہے 30 ستمبر تک ملکی سیاست کا اتار چڑھاؤ فیصلہ کن ہو جائے گا۔
دوسری جانب مشیر اطلاعات خیبرپختونخوا بیرسٹر ڈاکٹر سیف کا کہنا ہے کہ آئینی ترمیم کے نام پر اعلیٰ عدلیہ کو مفلوج کیا جا رہا ہے۔
اپنے ایک بیان میں بیرسٹر ڈاکٹر سیف نے کہا کہ کل وفاقی دارالحکومت اسلام آباد میں آئینی ترمیم کے نام پر ڈرامہ رچایا گیا، ساری رات آئینی ترمیم کے لئے ووٹ مانگا جا رہا تھا مگر مسودہ کسی کو نہیں دکھایا گیا، پتہ نہیں یہ آئینی مسودہ ہے یا ایون فیلڈ کی تفصیلات۔
ڈاکٹر سیف کا کہنا تھا کہ مسودے کو ایک ڈرامے کی طرح سسپینس میں رکھا گیا، ساری رات آئین وقانون کیساتھ کھلواڑ کیا گیا، اپنے مفادات کی بولیاں لگائی جا رہی تھی، پوری رات سپریم کورٹ پر شب خون مارنے کی تیاریاں ہو رہی تھی۔
